O Jehova dindža e Izraelcendže sudijen te vodinen ljen, ama on rodindže te ovel ljen kralj. Odoljese phendže e Samuilese: „Sa o narodija uzalo amende isi ljen kraljija hem amen mangaja te ovel amen kralj.“ O Samuilo džandža so odova tano pogrešno hem odoljese molindža pe e Jehovase. O Jehova phendža ljese: „O manuša na odbacinena tut, nego man. Phen ljendže so ka dobinen e kraljo, ama odova kralj ka rodel oljendar but buča.“ Iako džandže odova, on phendže: „Mangaja te ovel amen kralj, pa sar god te ovel.“

O Jehova vačerdža e Samuilese so o prvo kralj ko Izrael ka ovel jekh manuš kova vičini pe Saul. Ked o Saul dželo ko Samuilo ki Rama, o Samuilo pomazindža e Saule ja čhivdža lje te ovel kralj adžahar so čhordža ljese ulje upro šero.

Palo odova, o Samuilo vičindža e Izraelcen te čeden pe te mothovi ljendže e neve kraljo. Ama, naštindže te arakhen e Saule nigde. Džaneja li sose? Odoljese so garavdža pe. Ked arakhlje lje, andže lje maškar o narodo. O Saul hine najučo sarinendar hem hine but šužo. Tegani o Samuilo phendža: „Dikhen kas o Jehova birindža te ovel kralj.“ Ked o manuša dikhlje e kraljo hine but radosna.

Ki početka, o kralj Saul šundža e Samuile hem hine verno e Jehovase. Ama, palo disavo vreme menindža pe. Na primer, o kralj na valjandža te del žrtve. Ki jekh prilika, o Samuilo vačerdža e Saulese te adžičeri lje te avel, ama o Samuilo na alo odmah. Odoljese, o Saul odlučindža ov te del i žrtva. Sar reagujindža o Samuilo ked dikhlja akava? Ov phendža ljese: „Valjandžan te šune e Jehova.“ Da li o Saul sikljilo diso andi piklji greška?

Palo disavo vreme, ked o Saul dželo te borini pe e Amaličanencar, o Samuilo phendža ljese te mudari sarinen. Ama, o Saul odlučindža te na mudari e kraljo, e Agage. O Jehova phendža e Samuilese: „O Saul više na šunela man.“ O Samuilo  hine but tužno hem phendža e Saulese: „Odoljese so na šuneja e Jehova, ov ka birini avere kraljo“. Ked o Samuilo irindža pe te džal, o Saul doljindža lje ando ogrtači, ama o ogrtači cidindža pe ando oljeso vas. Tegani o Samuilo phendža ljese: „Isto sar so mo ogrtači cidindža pe ando to vas, adžahar o Jehova avdije ka cidel o kraljevstvo ando te vasta.“ O Jehova ka del o kraljevstvo nekase koj tano oljese poslušno hem kova mangela lje.