Yahova akhapasa Aisraeli atongi toera kuatsogolera, mbwenye iwo akhafuna mambo. Iwo apanga Samweli: ‘Madzindza onsene adatizungulira ali na amambo awo. Ife tisafunambo khala na mambo wathu.’ Samweli aipirwa na pyenepi, mbaphembera kuna Yahova. Yahova antawira: ‘Mbumba nee iri kukhonda iwe. Iwo akukhonda ine. Apange kuti ndinadzaapasa mambo, mbwenye iye anadzaaphemba pinthu pizinji.’ Ngakhale tenepo, mbumba yatawira: ‘Nkhabe pinthu. Ife tisafuna mambo!’

Yahova apanga Samweli kuti mamuna anacemerwa Sauli mbadakhala mambo wakutoma. Mudaenda Sauli kaona Samweli ku Rama, Samweli adzodza Sauli ninga mambo mukumuikha mafuta munsolo mwace.

Mukupita kwa ndzidzi, Samweli acemera Aisraeli toera kuapangiza mambo mupswa. Mbwenye nee akwanisa kuona Sauli. Usadziwa thangwi yanji? Thangwi iye akhadabisala pakati pa mitolo. Mudagumana iwo Sauli, ankwata mbamulimirisa pakati pa mbumba. Sauli akhali wakulapha kupiringana onsene, pontho akhali wakubalika kakamwe. Samweli alonga: ‘Onani. Uyu ndi mambo adakusankhulirani Yahova.’ Mbumba yakhuwa: ‘Mbakuzwe mambo.’

Mambo wakutoma Sauli akhabvera Samweli mbacita pikhafuna Yahova. Mbwenye iye adzacinja. Mwacitsandzo, mambo nee akhafunika kupereka ntsembe. Pa ndzidzi unango, Samweli akhadapanga Sauli kuti an’dikhire, mbwenye Samweli adembuka. Natenepa, Sauli apereka ntsembe ekhene. Kodi Samweli acitanji? Iye apanga Sauli: ‘Iwe nee ukhafunika kudawira Yahova.’ Kodi Sauli mbadapfundzanji na madawo ace?

Buluka penepo, pidaenda Sauli kamenya nkhondo na Amaleke, Samweli apanga Sauli kuti aaphe onsene. Mbwenye Sauli nee apha Mambo Agage. Yahova apanga Samweli: ‘Sauli andipasira nkhodolo, iye akhonda kucita pidampanga ine.’ Samweli atsukwala kakamwe,  mbapanga Sauli: ‘Nakuti wakhonda kubvera Yahova, iye anadzasankhula mambo unango.’ Mudazungunuka Samweli toera kuenda, Sauli aphata nguwo ya Samweli mbaikwewa. Nguwo yapanduka, iye mbasala na phindi m’manja. Buluka penepo, Samweli apanga Sauli: ‘Yahova anakupokosera umambo.’ Yahova mbadapasa umambo kuna munthu wakuti mbadanfuna na kumbvera.