Jéhovah amû ajuge ti fa lege na azo ti Israël, me ala ye mbeni gbia. Ala tene na Samuel, atene: ‘Amara kue so angoro e ayeke na agbia ti ala. E kue e ye nga mbeni gbia.’ Samuel abâ so ye ni so ayeke na lege ni ape, tongaso lo sambela Jéhovah na ndö ti tënë ni so. Jéhovah akiri tënë na lo, atene: ‘Azo ni ake mo pëpe. A yeke mbi la ala ke mbi. Tene na ala so ala peut ti wara mbeni gbia me gbia ni so ayeke hunda ande aye mingi na ala.’ Atâa so kue, azo ni atene: ‘E ke awe. E ye gï mbeni gbia!’

Jéhovah atene na Samuel so mbeni koli so iri ti lo ayeke Saül la ayeke ga kozo gbia ni. Na ngoi so Saül ague ti bâ Samuel na Ramah, Samuel asoro Saül ti ga gbia, na lege so lo tuku mafuta na li ti lo.

Na pekoni, Samuel airi azo ti Israël ti bungbi place oko, na lo fa na ala fini gbia ti ala. Me ala gi Saül gbä ala wara lo ape. Mo hinga ndani? A yeke ndali ti so lo honde terê ti lo na milieu ti akungba. Na ngoi so ala wara Saül, ala sigi na lo na ala zia lo na milieu ti azo ni. Saül ayo ahon azo ni kue, na lo yeke pendere mingi. Samuel atene: ‘Bâ zo so Jéhovah asoro lo la.’ Azo ni adekongo atene: “Gbia ti e na nduzu!”

Na tongo nda ni Gbia Saül amä Samuel na lo mä yanga ti Jéhovah. Me na pekoni, sarango ye ti lo achangé. Na tapande, a hunda lani pëpe na gbia ti mû asandaga. Mbeni lâ, Samuel atene na Saül ti ku ni ga awe si a mû sandaga ni, me Samuel aga hio ape. Tongaso, Saül adécidé ti mû asandaga lo wani. Samuel asara ye tongana nyen? Lo tene na Saül, lo tene: ‘Mo doit ti ke yanga ti Jéhovah ape.’ Eskê Saül ahinga faute ti lo so?

Kete na pekoni, na ngoi so Saül ague ti tiri bira na azo ti Amalec, Samuel atene na lo ti bata zo oko na fini ape. Me Saül ake ti fâ Gbia Agag. Jéhovah atene na Samuel: ‘Saül azia mbi awe, nga lo yeke mä mbi encore ape.’ Mawa asara Samuel mingi, na lo tene na Saül, lo tene: ‘Ndali ti so mo ke ti mä yanga ti Jéhovah, lo yeke soro  ande mbeni gbia nde.’ Tongana Samuel atourné ti hon, Saül agbu yanga ti kota bongo ti lo, na yanga ti bongo ti Samuel ni asuru. Na pekoni Samuel atene na Saül, atene: ‘Jéhovah ayeke zi royaume ni na maboko ti mo.’ Ni la, Jéhovah aleke ti mû royaume ni na mbeni zo so aye lo nga amä yanga ti lo.