Ty mpitsara ro nirahini-Jehovah hitariky ty Israelita, fe ta hana mpanjaka rozy. Nivola tamy Samoela rozy hoe: ‘Mba ta hana mpanjaka manahaky ty firenena manodidy anay koa zahay.’ Raty ty fahitani-Samoela ani-raha zay, ka nivavaky tamy Jehovah ie. Nivola taminy Jehovah hoe: ‘Tsy iha ro tsy tean-drozy fa zaho. Volano rozy hoe afaky hana mpanjaka vatany rozy, fe hila raha maro amin-drozy mpanjaka zay.’ Ndre teo aza zay, le hoy vahoaky rey: ‘Tsy ahoanay zao. Mila mpanjaka avao zahay!’

Nivolanini-Jehovah amy zay Samoela hoe Saoly ro ho mpanjaka. Lafa nitsidiky ani-Samoela ta Rama any Saoly, le nihosorani-Samoela ho mpanjaka, ka nasiany menaky ty lohany.

Navorini-Samoela iaby Israelita reo tafarani-zay, soa hahita mpanjakan-drozy vaovao zao. Fe tsy nihitan-drozy mihintsy Saoly. Hainao va ty antony? Nivony tamy enta rezay tao ie. Lafa nihitan- drozy amy zay ie, le nalan-drozy tao, bakeo nampitsanganin- drozy anivon’olo maro eo. Abo mandilatsy an-drozy iaby ie, sady tovolahy biby. Le hoy Samoela: ‘Io lahilahy nifilini-Jehovah zao.’ Nikorakoraky iaby ty olo nanao hoe: ‘Ho lava velo lahy iha Mpanjaka!’

Nijanjy ani-Samoela tse Saoly Mpanjaka tamy voalohany sady nanoriky ty safàni-Jehovah. Fe niova ie lafa tafara atoy. Tsy nahaliny ani-Samoela, ohatsy, ie ndraiky zay, ka nanao soro tamy alitara eo. Samoela amin’io fa nivola taminy hoe ho avy hanao ani-soro iny. Ino hoasani-Samoela lafa nahita ani-zay? Nivola tamy Saoly ie hoe: ‘Tsy mety raha ataonao toy, satria tsy nanoriky ty safàni-Jehovah iha.’ Nanoriky safà vatany va Saoly tafarani-zay?

Nialy tamy Amalekita reo Saoly tafara tatoy. Nivola taminy Samoela hoe tokony haripaky iaby rozy, fa tsy misy engà ho velo. Fe tsy nivonoani-Saoly Agaga Mpanjaka. Hoy Jehovah tamy Samoela: ‘Tsy nijanjy ahy Saoly. Mbo tsy manoriky ty safàko avao ie.’ Nalahelo biby Samoela, le nivola tamy Saoly hoe: ‘Hifily mpanjaka hafa Jehovah  satria tsy nanoriky ty safàny sasy iha.’ Niala teo amy zay Samoela, fe nitanjahini-Saoly ty akanjony le nidriatsy. Bakeo hoy Samoela: ‘Fa nidriatiani-Jehovah koa ty fanjakànao soa hiala aminao.’ Hameani-Jehovah olo tea azy noho manoriky ty safàny amy zay fanjakà iny.