Na tofia e Ieova faamasino Isaraelu e taʻitaʻia i latou, ae na latou mananaʻo i se tupu. Na latou faapea atu iā Samuelu: ʻUa iai uma tupu o isi nuu. E matou te mananaʻo foʻi i so matou tupu.’ Na manatu Samuelu e sesē lenei mea, o lea na ia tatalo atu ai iā Ieova e faatatau i lea mataupu. Na faapea mai Ieova iā te ia: ʻE lē o tetee tagata iā te oe, ae ua latou tetee mai iā te aʻu. Ia faapea atu e mafai ona fai so latou tupu, ae e tele mea o le a manaʻomia e le tupu mai iā i latou.’ Ae na tali atu le nuu: ʻE matou te lē popole i lenā mea. E pau le mea e matou te mananaʻo i ai o se tupu.’

Na faapea mai Ieova iā Samuelu, o le a avea se tamāloa e igoa iā Saulo ma tupu muamua o le nuu. Ina ua asiasi atu Saulo iā Samuelu i Rama, ona faauu lea e Samuelu o Saulo e avea ma tupu, e ala i le liligiina o le suāuu i lona ulu.

Mulimuli ane ona faapotopoto ai lea e Samuelu o tagata Isaraelu, e faailoa atu i ai lo latou tupu fou. Ae ua latou lē iloa po o fea o iai Saulo. E te iloa le māfuaaga? Talu ai sa lafi o ia i le mea o iai ato. Ina ua latou maua Saulo, ona latou aumaia lea o ia i luma o tagata. E sili atu le umī o Saulo i lo o isi tagata uma, ma e sili atu foʻi lona aulelei. Na faapea atu Samuelu: ʻFaauta, o lē ua filifilia e Ieova.’ Ona alalaga atu lea o tagata: ʻIa soifua le tupu.’

I le taimi muamua, na faalogo le tupu o Saulo iā Samuelu ma usitaʻi iā Ieova. Ae na mulimuli ane sui ona uiga. O se faataʻitaʻiga, sa lē tatau iā Saulo ona ofoina atu ni taulaga. I se tasi taimi, na fai atu ai Samuelu iā Saulo e faatali mo ia, ae na tuai ona alu ane Samuelu. O lea na filifili ai Saulo e ofo loa e ia taulaga. O le ā le tali atu a Samuelu? Na faapea atu Samuelu iā Saulo: ʻSa tatau ona e usiusitaʻi iā Ieova.’ Po o le a aʻoaʻoina e Saulo se lesona mai i le mea sesē na ia faia?

Mulimuli ane, ina ua alu Saulo e tau ma tagata Amaleka, na fai atu Samuelu iā te ia e aua neʻi faasaoina se tasi o i latou. Ae na filifili Saulo e faasaoina Akako le tupu o Amaleka. Na faapea atu Ieova iā Samuelu: ʻUa liliuese Saulo mai iā te aʻu, ma ua lē faalogo o ia iā te aʻu.’  Na matuā faanoanoa Samuelu ona o lenei mea ma faapea atu iā Saulo: ʻTalu ai ua e lē toe usiusitaʻi iā Ieova, o le a ia filifilia se isi tupu.’ A o alu ese Samuelu, ae tago atu Saulo i le pito o lona ofu ma masae ai. Ona fai atu lea o Samuelu iā Saulo: ʻUa aveesea e Ieova le malo mai iā te oe.’ Na finagalo Ieova e tuuina atu le malo i se tasi e alofa ma usiusitaʻi iā te ia.