Jeobá nixnúún jueces bi̱ israelitas mu maxná ikhúún, mú ikhiin nindúún muguaʼdaa mbáa rey. Ikha jngó, nitháán Samuel: “Náa xúgíʼ i̱ʼwáʼ xuajen guáʼdaa mbáa rey, ikháanʼ mangáanʼxu nanduxu mbáa”. Samuel ndiʼyoo dí rúʼko̱ na̱nguá májánʼ. Ikhú niʼthá kháñuu Jeobá, ga̱jma̱a̱ ikhaa niriʼñuu rígi̱: “Xa̱bu̱ xuajen raʼkháa ikháánʼ tsíñún gúyááʼ, ikhúúnʼ ni̱ndxu̱ʼ bi̱ tsíñún gúyáá. Arathún rí ma̱ndoo maguaʼdaa mbáa rey, mú rey buʼko̱ mbaʼa rí gándu̱ʼu̱u̱n”. Mú xa̱bu̱ nuthi: “¡Tséʼniuu! ¡Nanduxu muguaʼdáaxu mbáa rey!”.

Ikhú Jeobá niʼthúu̱n Samuel rí mbáa xa̱bu̱ bi̱ mbiʼyuu Saúl mani̱ndxu̱u̱ timbáa rey. Índo̱ Saúl ni̱jkha̱ gáʼyoo Samuel náa Ramá, Samuel niraʼwíi, o nixidirámuʼ aceite náa edxu̱u̱, mu makujmaa rí nindxu̱u̱ rey.

Nda̱wa̱á, Samuel nigímbíin xúgínʼ israelitas mu masngájmiuun bi̱ mani̱ndxu̱u̱ rey ndrígiu̱ún. Mú tuxkama̱a̱. Lá natayáá náa numuu ráʼ. Numuu rí nirkaʼuminaʼ náa tapo̱o̱ xúgíʼ rí kagu̱ ni̱jkha̱. Índo̱ nixkama̱a̱, niriya̱a̱ʼ ikhí ga̱jma̱a̱ nitsijii náa tapu̱ún xa̱bu̱. Ikhaa itháan mba̱yi̱ʼ ki xóo eʼwíínʼ ga̱jma̱a̱ mitsiʼyáa wéñuʼ. Samuel niʼthí: “Gu̱ya̱a̱ tsáa niraʼwíi Jeobá”. Índo̱ xa̱bu̱ ndiyáá rey ikhú nidxún wéñuʼ.

Nákha ginii, rey Saúl niʼnimbo̱o̱ kaʼyoo Samuel ga̱jma̱a̱ niʼnimbo̱o̱ kaʼyoo Jeobá. Mú nda̱wa̱á niriʼkuminaʼ. Mbóo mbiʼi, Samuel niʼthúu̱n Saúl dí magiʼthu̱u̱n mu maxnáxi̱ tsigijñaʼ. Rey na̱nguá kaʼyoo maxnáxi̱ tsigijñaʼ. Mú Samuel ndijyúuʼ, ikha jngó Saúl mbáwíi nixnáxi̱ tsigijñaʼ. Ndiéjunʼ niʼni Samuel rá. Niʼthúu̱n: “Ndiyóoʼ matanimbaaʼ xtayáá Jeobá mú tátani”. Lá rígi̱ niʼsngóo Saúl dí gíʼmaa maʼnimbo̱o̱ kaʼyoo má xúʼko̱ Jeobá rá.

Nda̱wa̱á, Saúl ni̱jkha̱ gaxmínaʼ gajmíi̱n amalequitas, ga̱jma̱a̱ niʼthúu̱n rí magudíin xúgínʼ. Mú Saúl taxíyáa rey Agag. Ikhú Jeobá niʼthúu̱n Samuel: “Saúl niniñuʼ, nánguá eʼnimbo̱o̱ kaʼyoʼ”. Samuel nixtáa gíná wéñuʼ, ikha jngó niʼthúu̱n Saúl: “Jeobá mbayáaʼ imba̱a̱ rey  numuu rí ikháánʼ nánguá etanimbaʼ xtayáá”. Índo̱ Samuel niguta̱nga̱a̱ mu maʼga̱a̱, Saúl nigujtuun rawunʼ xtíñuu ga̱jma̱a̱ nixkuʼtu. Samuel niʼthúu̱n Saúl: “Xúʼko̱ garíya kaʼyáʼ reino Jeobá”. Rúʼko̱ nindoo gáʼthúu̱n rí Jeobá maxnúu reino imba̱a̱ xa̱bu̱ bi̱ ma̱ndoo kaʼyoo ga̱jma̱a̱ bi̱ maʼnimbo̱o̱ kaʼyoo.