Yehova yange a tsua orjir nan hemen Mbaiserael. Kpa ken masejime yô, Mbaiserael va soo u lun a tor. Ve kaa a Samuel ér: ‘Akuraior a a kase se ne cii nga a ator. Se kpa se soo u lun a tor.’ Samuel nenge ér ve tsume, nahan a er msen hen Yehova sha kwagh shon. Yehova kaa a na ér: ‘Ka we ior mban ve lu vendan ga. Kpa ka mo ve lu vendan ye. Yô, kaa ve wer vea fatyô u lun a tor, kpa tor la nana soo ér ve naan nan akaa kpishi.’ Nahan cii kpa, ior kaa ér: ‘Ka kwagh ga. Se soo u lun a tor!’

Yehova maa ôr Samuel or u nana hii lun tor u Iserael la. Iti i or shon ér Saulu. Saulu yange za hen Samuel hen Rama, maa Samuel za haa un mkurem sha ityou, ér a lu tor.

Shighe karen yô, Samuel yila Mbaiserael cii zua ér una tese ve or u nan lu tor ve yô. Kpa i lu keren Saulu nengen a na ga. U fa kwagh u yange na ve i lu nengen a na ga kpa? Yange za yer hen ape ior haa ikyav yô. Mba va zuan a na yô, ve due a na ken tembe, va tile hen atô u ior. Saulu yange tav kar hanma or cii, shi doo or kpaa. Samuel maa kaa ér: ‘Nenge nen, ka or u Yehova a tsua je ne.’ Tsô ior gba geren kaan ér: ‘Tor a lu uma gbem!’

Sha hiihii la, Saulu lu keghen ato a Samuel shi lu ungwan imo i Yehova. Kpa ken masejime yô, va de. U tesen ikyav yô, yange gba u Saulu una nanden iniav iyol na ga. Kwagen la Samuel, profeti u Yehova kaa a Saulu ér a kegh un saa una va. Kpa Samuel kera va fele ga. Maa Saulu nande naagh iyol na. Nahan Samuel er nena? Samuel kaa a na ér: ‘U hemba Yehova ato nahan ka shami ga.’ Saulu yange hen kwagh ken kwagh ne kpa?

Shighe karen yô, Saulu za u za nôngon ityav a Mbaamaleki. Samuel vande kaan a na ér a wua hanma or cii. Kpa Saulu za kôr Tor Agagu va a na uma. Nahan Yehova kaa a Samuel ér: ‘Saulu undum, shi ungwan imo yam ga.’ Kwagh ne yange vihi Samuel kpishi, nahan a kaa a Saulu ér: ‘Er u de u ungwan imo i Yehova yô, una tsua tor ugen.’ Samuel  geman ér una yem yô, Saulu gba un uwegh sha ikyondo, maa ikyondo shon ande. Samuel maa kaa a Saulu ér: ‘Yehova ande u tartor gema na orgen.’ Lu u Yehova una gema tartor la una na orgen u nana soo un, shi nana ungwan imo na yô.