Jehowa akasha ase Isariyɛlɛ toshushi dia mbalɔmbɔla, koko vɔ wakalange dia monga la nkumekanga. Vɔ wakatɛ Samuɛlɛ vate: ‘Wedja tshɛ wotodingi wekɔ la nkumi ya dikanga. Ndo sho la wɔ nangaka monga la nkumekanga.’ Samuɛlɛ akɔshi dia dui sɔ diaki kɔlɔ, ɔnkɔnɛ nde akalɔmbɛ Jehowa lo dikambo diakɔ. Jehowa akawotɛ ate: ‘Anto anɛ aha wɛ kambowotona. Dimi mbambowotona. Tɛwɔ dia vɔ koka monga la nkumekanga, koko nkumekanga kɛsɔ ayohika akambo efula oma le wɔ.’ Kaanga mbakidiɔ ngasɔ, anto wakate vate: ‘Sho hatete. Sho nangaka monga la nkumekanga!’

Jehowa akatɛ Samuɛlɛ dia pami kɛmɔtshi lokombo lande Saolo ayonga nkumekanga ka ntondo. Etena kakatshu Saolo dia tenda Samuɛlɛ la Rama, Samuɛlɛ akasɔnɛ Saolo oko nkumekanga lo mbotɛ esɔ l’ɔtɛ.

L’ɔkɔngɔ diko, Samuɛlɛ akete ase Isariyɛlɛ tshɛ dia mbaɛnya nkumekanga kawɔ k’oyoyo. Koko Saolo kɔmɛnama ndooko dihole. Onde wɛ mbeyaka lande na? Nɛ dia nde akatoyashɛ l’atei w’etshumu. Etena kakawayɛnaka Saolo, vɔ wakotondja, wakawemadia l’atei w’anto. Saolo akaleke anto tshɛ otale ndo nde aki olangala efula. Samuɛlɛ akate ate: ‘Onto lambɔsɔna Jehowa nde ɔnɛ.’ Anto wakate la dui dia wolo vate: ‘Nkumekanga alombe!’

L’etatelo, nkumekanga Saolo akahokamɛka kɛnɛ kakawotɛka Samuɛlɛ ndo akakitanyiyaka Jehowa. Koko nde akayotshikitana. Ɛnyɛlɔ, nkumekanga takinde la lotshungɔ la nambola elambo. Lo diaaso dimɔtshi, Samuɛlɛ akatɛ Saolo dia nde mbokonga, koko Samuɛlɛ kondja mbala kakɔ ɔtɔi. Ɔnkɔnɛ, Saolo akɔshi yɛdikɔ ya ndamɛ nambola olambo. Kakɔna kakasale Samuɛlɛ? Nde akawotɛ ate: ‘Wɛ hahombe monga l’ohindodi otsha le Jehowa.’ Onde Saolo akakondja wetshelo oma lo munga kande?

L’ɔkɔngɔ diko, etena kakatshu Saolo dia tɔlɔsha ase Amalɛka, Samuɛlɛ akatɛ Saolo diaha nde ntshika kaanga onto ɔtɔi la  lɔsɛnɔ. Koko Saolo akɔshi yɛdikɔ yaha ndjaka Nkumekanga Anganga. Jehowa akatɛ Samuɛlɛ ate: ‘Saolo ambomboka ɔkɔngɔ, nde hayompokamɛ.’ Samuɛlɛ aki la lonyangu l’efula ndo akatɛ Saolo ate: ‘Lam’ele wɛ ambotshika dia monga l’okitanyiya otsha le Jehowa, nde ayɔsɔna nkumekanga kekina.’ Kam’akakadimɔ Samuɛlɛ dia nde ntshɔ, Saolo akokumbatɛ ndo ohembo w’okutu wa Samuɛlɛ wakaatɛ. Ko Samuɛlɛ akatɛ Saolo ate: ‘Jehowa ambonya diolelo oma le yɛ.’ Jehowa ayanga mbisha diolelo le onto ɔmɔtshi lawoka ngandji ndo l’okitanyiya.