Yehova wangusankha akuyeruzga kuti alongozgengi Ayisraele kweni yiwu apenjanga fumu. Ayisraele angukambiya Samuele kuti: ‘Mitundu yosi yo te nayu pafupi ye ndi mafumu. Nasi tikhumba fumu.’ Samuele wanguwona kuti vo angukamba venga vamampha cha. Mwaviyo, wangukambiya Yehova nkhani iyi. Yehova wangukambiya Samuele kuti: ‘Ŵanthu wo akana yiwi cha kweni akana ini. Akambiyi kuti angaja ndi fumu, kweni fumu yo yazamukhumba vinandi kwaku yiwu.’ Chinanga kuti venga viyo, ŵanthu wo anguti: ‘Palivi suzgu. Tipenja fumu isi!’

Yehova wangukambiya Samuele kuti munthu munyaki zina laki Sauli, ndiyu wajengi fumu yakwamba. Sauli wati waluta kuchikumana ndi Samuele ku Rama, Samuele wangumusankha kuja fumu mwakumupunguliya mafuta pamutu.

Pavuli paki, Samuele wangudana Ayisraele wosi kuti waŵalongo fumu yasonu. Kweni Sauli pengavi. Kumbi waziŵa ko wenga? Iyu wangubisama mukati mu vinthu. Ŵati amusaniya, anguza nayu ko kwenga Ayisraele ndipu angumumika pakati pawu. Sauli wenga mutali kuluska weyosi ndipu wenga wakutowa ukongwa. Samuele wangukamba kuti: ‘Wonani yo Yehova wasankha.’ Ŵanthu angudaniriza kuti: ‘Fumu yije ndi umoyu utali!’

Pakwamba, Fumu Sauli yamuvwiyanga Samuele ndipu yachitanga vo Yehova wakhumbanga. Kweni pavuli paki yingusintha. Mwakuyeruzgiyapu, fumu yazomerezekanga cha kupereka sembi. Pa nyengu yinyaki, Samuele wangukambiya Sauli kuti wamulindizi kweni Samuele wanguswera ukongwa. Mwaviyo, Sauli wanguŵanaŵana kuti wapereki sembi. Kumbi Samuele wanguchita wuli? Iyu wangukambiya Sauli kuti: ‘Wananga kuleka kuvwiya Yehova.’ Kumbi Sauli wangusambirapu kanthu pa vo wangunangisa?

Pavuli paki, pa nyengu yo Sauli wanguluta kuchichita nkhondu ndi Amaleke, Samuele wangumukambiya kuti wakabayi weyosi. Sauli wanguyibaya cha Fumu Agagi. Yehova wangukambiya Samuele kuti: ‘Sauli wandisiya ndipu wandivwiya cha.’ Samuele wangudandawula ukongwa ndipu wangukambiya Sauli kuti: ‘Chifukwa chakuti waleka kuvwiya Yehova, iyu wasankhengi fumu yinyaki.’ Samuele wati wang’anamuka kuti walutengi,  Sauli wanguko chakuvwala chaki ndipu chingukeluka mumphepeti. Pavuli paki, Samuele wangukambiya Sauli kuti: ‘Yehova wakulonda ufumu.’ Yehova watingi waperekengi ufumu wo ku munthu munyaki yo watingi wamuyanjengi ndi kumuvwiya.