Yehovha a a nyike Vaisrayele vaavanyisi leswaku va va rhangela, kambe vona a va lava hosi. Va byele Samuwele va ku: ‘Matiko hinkwawo lawa hi akelaneke na wona ma ni tihosi. Na hina hi lava hosi.’ Samuwele u vone sweswo ku ri nchumu wo biha, kutani u khongele eka Yehovha hi mhaka leyi. Yehovha u te: ‘Vanhu lava a va fularheli wena. Va fularhela mina. Va byele leswaku va ta va ni hosi kambe yi ta lava swilo swo tala eka vona.’ Nilokoswiritano, Vaisrayele va te: ‘A hi na mhaka na swona. Hi lava ku va ni hosi!’

Yehovha u byele Samuwele leswaku wanuna loyi a vitaniwaka Sawulo hi yena a nga ta va hosi yo sungula. Loko Sawulo a endzele Samuwele eRhama, Samuwele u n’wi tote a va hosi hi ku n’wi chela mafurha enhlokweni.

Endzhakunyana, Samuwele u vitane Vaisrayele leswaku va hlengeletana leswaku a ta va komba hosi ya vona leyintshwa. Kambe Sawulo a a nga kumeki. Wa swi tiva leswaku ha yini? Hikuva a a tumbele exikarhi ka nhundzu. Loko se va n’wi kumile, va n’wi tisile a ta yima exikarhi ka vanhu. Sawulo a a sasekile swinene naswona a a lehe ku tlula vanhu hinkwavo lava a va ri kwalaho. Samuwele u te: ‘Hi loyi munhu loyi Yehovha a mi hlawuleleke yena.’ Vanhu va huwelerile va ku: ‘Hosi a yi hanye hilaha ku nga heriki!’

Eku sunguleni Hosi Sawulo u yingise Samuwele a tlhela a landzela swileriso swa Yehovha. Hi ku famba ka nkarhi u cincile. Hi xikombiso, hosi a yi nga fanelanga yi endla magandzelo. Siku rin’wana Samuwele u byele Sawulo leswaku a n’wi yimela leswaku ku va yena loyi a nga ta endla magandzelo, kambe Samuwele u hlwele ku fika. Kutani Sawulo u endle xiboho xo endla magandzelo hi yexe. Samuwele u te yini? U te: ‘A wu nga fanelanga u tlule nawu wa Yehovha.’ Xana Sawulo u dyondze swo karhi eka xihoxo xakwe?

Hi ku famba ka nkarhi, loko Sawulo a ye a ya lwa ni Vaamaleke, Samuwele u byele Sawulo leswaku u fanele a va dlaya hinkwavo. Kambe Sawulo a nga n’wi dlayanga Hosi Agaga. Yehovha u byele Samuwele a ku: ‘Sawulo u ndzi tshikile naswona a nga ndzi  yingisanga.’ Sweswo swi n’wi hlundzukise swinene Samuwele kutani a byela Sawulo a ku: ‘Leswi u nga n’wi yingisangiki Yehovha, yena u ta hlawula hosi yin’wana.’ Loko Samuwele a hundzuluka a famba, Sawulo u koke nguvu yakwe kutani yi handzuka. Kutani Samuwele u byele Sawulo a ku: ‘Yehovha u ku tekele mfumo.’ Yehovha a a ta wu nyika munhu un’wana mfumo lowu, loyi a a ta n’wi yingisa ni ku n’wi rhandza.