Yahwe akaba ahaire Abaisareri abacwi b’emisango nubo babebembere baitu Abaisareri bakaba nibagonza omukama. Bakagambira Samuiri bati: ‘Amahanga goona agatwetoroire gaine abakama. Naitwe nitugonza omukama.’ Samuiri akarora ekintu kinu kitahikire kandi yacwamu kukigambira Yahwe. Yahwe akamugambira ati: ‘Abantu banu tibangire iwe, baitu, bangire nyowe. Bagambire ngu nibaija kutunga omukama baitu n’aija kwikaraga n’abasaba ebintu bingi.’ N’obu yabagambiire ekintu kinu, bakongera bagamba bati: ‘Itwe eki tikiri ky’amaani. Ekiturukugonza nuwe omukama!’

Yahwe akagambira Samuiri ngu, omusaija arukwetwa Saulo nuwe akaba n’agenda kuba mukama w’okubanza. Saulo obu yagenzere kubungira Samuiri omu Rama, Samuiri akamusesaho amagita ha mutwe nukwo afooke mukama.

Hanyuma y’obwire, Samuiri aketa Abaisareri boona nukwo aboleke omukama wabo omuhyaka. Baitu bakaserra Saulo yabura. Nomanya habwaki? Habwokuba akaba ayeserekere omu migugu. Obu bamuzoire, bakamuleta bamwemereza hagati y’abantu. Saulo obuyayemeriire hagati yabo, nuwe akaba nakirayo kuraiha kandi akaba ali murungi muno ha maiso. Samuiri akagamba ati: ‘Murole omukama Yahwe abakomiire.’ Abantu bakatokera haiguru nibagamba: ‘Ohangaale omukama!’

Ha kubanza, Saulo yahulirizaga kandi yayoroberaga Yahwe. Baitu hanyuma y’obwire akahinduka. Ekyokurorraho, omukama akaba atarukwikirizibwa kuhonga ebihongwa. Kiro kimu, Samuiri akagambira Saulo ngu amulinde aije. Baitu Samuiri obu yakereriirwe, Saulo akacwamu kuhonga ebihongwa. Samuiri akehurra ata? Akamugambira ati: ‘Obaire otasemeriire kujemera Yahwe.’ Notekereza Saulo akegera ha nsobi ye?

Hanyuma y’akasumi, Saulo obu yagenzere kurwanisa Abamaleki, Samuiri akamugambira kubaita boona. Baitu Saulo, ataite Omukama  Agagi. Yahwe akagambira Samuiri ati: ‘Saulo andugireho kandi takyampurra.’ Samuiri akabihirwa muno yagambira Saulo ati: ‘Kusigikira nk’oku ocwiremu kujemera Yahwe, n’agenda kukoma omukama ondi.’ Samuiri obu yahindukire kugenda, Saulo akakwata ekijwaro kya Samuiri, kyatemuka. Samuiri akagambira Saulo ati: ‘Yahwe akutemwireho obukama bwa Isareri.’ Yahwe akaba n’agenda kukwasa obukama omuntu ondi omuhulizi kandi arukumugonza.