Ua maiti Iehova i te mau tavana no te aratai i to Iseraela. Ua hinaaro râ te nunaa i te hoê arii. Ua parau to Iseraela ia Samuela: ‘E arii to te mau nunaa atoa e ati aˈe ra ia tatou. Hinaaro atoa matou i te hoê arii.’ No Samuela, mea ino tera aniraa. Ua pure atura oia ia Iehova no nia i te reira. Ua parau Iehova ia ˈna: ‘Aita te nunaa e faarue nei ia oe. O vau râ ta ratou e faarue nei. A parau atu e e nehenehe ratou e fanaˈo i te hoê arii. Tera râ, e faahepo te arii ia rave ratou e rave rahi ohipa.’ Noa ˈtu râ, ua parau te nunaa: ‘Haapao ˈtu matou! Te hinaaro nei matou i te hoê arii!’

Ua parau Iehova ia Samuela e e riro te taata ra, o Saula to ˈna iˈoa, ei arii matamua no ratou. Ua haere Saula e farerei ia Samuela i Rama. Ua faatahinu atura Samuela ia Saula ei arii ma te manii maa hinu i nia i to ˈna upoo.

I muri iho, ua haaputuputu Samuela i to Iseraela no te faaite atu i to ratou arii apî. Aita râ ratou i ite aˈe teihea roa o Saula. Ua ite anei oe no te aha? No te mea ua tapuni oia i muri i te mau afata tauihaa. A ite ai ratou ia Saula, ua rave ratou ia ˈna e ua afai ratou ia ˈna i ropu i te nunaa. Mea rahi aˈe o Saula i te mau taata atoa e mea haviti roa oia. Ua parau Samuela: ‘Teie te taata ta Iehova i maiti.’ Ua tuô te nunaa: ‘Ia ora te arii!’

Na mua roa, ua faaroo te arii Saula ia Samuela e ua rave oia mai ta Iehova i ani atu. I muri iho râ, ua taui oia. Ei hiˈoraa, aita te arii i faatiahia ia pûpû i te mau tusia. I te hoê taime, ua parau Samuela ia Saula ia tiai ia ˈna. Aita râ Samuela i tae oioi. Ua faaoti atura Saula ia pûpû oia i te mau tusia. Eaha to Samuela huru a ite ai i te reira? Ua parau atu oia: ‘Ahiri aita oe i faaroo ore ia Iehova.’ Ua huti anei Saula i te haapiiraa no ta ˈna hape?

I muri iho, ua aro Saula i to Amaleka. Ua parau Samuela ia Saula ia haapohe pauroa te taata no Amaleka. Ua faaoti râ Saula i te faaora mai i te arii Agaga. Ua parau Iehova ia Samuela: ‘Ua faarue Saula ia ˈu. Aita oia e faaroo ra ia ˈu.’ Ua mauiui roa Samuela e ua parau oia ia Saula: ‘Ua  faaea oe i te faaroo ia Iehova. E maiti ïa Iehova i te tahi atu arii.’ A haere ai Samuela, ua haru ihora Saula ia Samuela e ua mahae atura to ˈna hiti ahu. Ua parau atura Samuela ia Saula: ‘Mai teie ahu tei mahae, e iriti atoa Iehova i te faatereraa ia oe ra.’ E horoa Iehova i tera faatereraa i te tahi atu taata o te here e o te faaroo ia ˈna.