Корум-чурум тудар кылдыр, Иегова баштыңчыларны томуйлап каарга, израильчилер хаан негээн. Олар Самуилге чугаалаан: «Кожа чоннар хаанныг-дыр, бис база хаанныг болуксап тур бис». Самуил оларның дилээнге таарзынмайн, ооң дугайында Иеговага мөргээн. Иегова аңаа мынча дээн: «Олар сенден эвес, а менден ойталап турар-дыр. Олар хаанныг апаар болза, оозу оларның шупту чүүлүн аппаар деп дамчыт». Ынчалза-даа чон: «Биске хамаанчок, хаанныг болуксап тур бис!» — дээн.

Иегова Самуилге Израильдиң бир дугаар хааны Саул деп кижи боор дээн. Саул Рама деп хоорайга чедип кээрге, Самуил ооң бажынче үстү куткаш, хаан кылдыр томуйлап каан.

Ооң соонда Самуил израильчилерниң чаа хаанын көргүзер дээш, оларны чыып алган. Ынчалза-даа ол Саулду тыппайн барган? Чүге, билир сен бе? Ол чаштына берген болган. Саулду чон мурнунга эккээрге, ол дыка узун, чараш кижи болган. Самуил мынча дээн: «Иегованың шилип алган кижизи бо-дур». Ынчан чон: «Бистиң хаанывыс алдаржызын!» — деп өөрүп алгырышкан.

Баштай Саул Самуилди дыңнап, Иеговага бердинген чораан. Ооң соонда ол өскерли берген. Чижээ, Хоойлу ёзугаар хаан өргүл салбас ужурлуг турган. Бир катап Самуил Саулду манаарын дилээн. Самуил келбейн туруп бээрге, Саул өргүлдү боду салыпкан. Оон Самуил чедип келгеш: «Сен чүнү кылып алдың? Чүге Иегованы дыңнавадың?» — дээн. Саул частырыындан өөренип алган бе?

Соонда Саул амаликтер-биле дайылдажыр дээш чорупкан. Самуил аңаа: «Кымны-даа диригге арттырбас сен!» — дээн. Ынчалза-даа Саул Агаг хаанны дириг арттырып каан. Иегова Самуилге мынча дээн: «Саул менден хая көрнү берди! Ол ам меңээ дыңнангыр эвес апарган». Самуил аажок муңгарап, Саулга келгеш: «Сен Иеговага  дыңнангыр эвес апарган-дыр сен. Ынчангаш ол өске хаанны шилип алыр» — дээн. Самуил чоруп бар чыдырда, Саул ооң хевиниң эдээнден туттунуптарга, оозу орлу берген. Ынчан Самуил аңаа: «Шак ынчаар Иегова сээң хаан чагыргаң хунаап алыр» — дээн. Иегова аңаа дыңнангыр болгаш ынак кижини хаан кылдыр томуйлап алыр деп шиитпирлээн.