Yehova wa ecele ku va Isareli olonganji oco vi va songuile, pole, ovo va yonguile osoma yimue. Ovo va sapuila Samuele vati: ‘Omanu vosi va tu ñuala va kuete olosoma. Etu tu yongolavo osoma yimue.’ Olondaka viaco ka via sanjuisile Samuele omo liaco wa likutilila ku Yehova catiamẽla kondaka yaco. Yehova wo sapuila hati: ‘Omanu ka va kasi oku ku likala ove. Ovo va kasi oku ndi likala ame. Va sapuila okuti va pondola oku kuata osoma yimue, pole, osoma yaco yi laika oku va kisika ovina vialua.’ Kuenje omanu va tambulula vati: ‘Hacimueko kokuetu. Tu yongola muẽle osoma!’

Yehova wa sapuila Samuele okuti, ulume umue o tukuiwa hati Saulu eye o linga osoma yatete. Eci Saulu a enda oku ka nyula Samuele ko Rama, Samuele wa waveka Saulu ndosoma poku kapa ulela kutue waye.

Noke Samuele wongolola va Isareli, oco a va lekise osoma yavo yokaliye. Ovo va kala loku u sandiliya, pole, ka vo sangele. Ove hẽ wa kũlĩha esunga liaco? Momo eye wa kala oku salama pokati kovikuata. Eci ovo va sanga Saulu, vo tuala kosamua kuenje vo talamisa pokati komanu. Saulu wa lepele calua okuti omanu vakuavo ci sule kuenda wa finile calua. Samuele wa popia hati: ‘Tali omunu Yehova a nõla.’ Omanu va kaluka vati: ‘Soma a kale hũ lomuenyo!’

Kefetikilo, Soma Saulu wa yevelela Samuele kuenda wa pokola ku Yehova. Pole, noke wa pongoloka. Soma ka kuatele omoko yoku eca ovilumba. Onjanja yimue Samuele wa sapuila Saulu oco a kevelele toke eci eye a pitĩla, pole, Samuele ka pitĩlile vepuluvi liaco. Kuenje Saulu wa nõlapo eye muẽle oku eca ocilumba. Nye Samuele a linga? Eye wa sapuila Saulu hati: ‘Kua sukilile oku lekisa esino ku Yehova.’ Anga hẽ Saulu wa sukilile oku lilongisila kakulueya aye?

Noke, eci Saulu a endele oku ka liyaka la va Amaleke, Samuele wa sapuila Saulu oco a va ponde vosi okuti ka pa supi laumue. Pole, Saulu wa nõlapo oku popela Soma Agage. Yehova wa sapuila Samuele hati: ‘Saulu wa liwekapo oku ñuama, kuenda ka pokuile kokuange.’ Samuele wa sumuile calua, kuenje wa sapuila Saulu hati: ‘Omo okuti ove wa liwekapo oku pokola ku Yehova eye o laika oku  nõla osoma yikuavo.’ Eci Samuele a ñualapo oco a ende, Saulu wa kuata vonanga ya Samuele kuenje ya toka. Samuele wa popia la Saulu hati: ‘Yehova wa tambula usoma peka liove.’ Yehova o laika oku eca usoma komunu una okuti, o kuetele ocisola Yehova kuenda o pokola kokuaye.