Jihova vwẹ iguẹdjọ vwo mu nẹ ayen sun ihwo rẹ Izrẹl na, ẹkẹvuọvo ayen guọnọ ovie. Ayen da ta kẹ Samuẹl: ‘Ẹgborho re riariẹ avwanre phiyọ na eje vwo ivie. Avwanre je guọnọ ovie.’ Iroro na je Samuẹl kakaka-a, ọ da nẹrhovwo kẹ Jihova kpahọn. Jihova da vuẹ: ‘Ọ diẹ owẹ yen ihwo na senre-e. Mẹvwẹ yen ayen senre. Vuẹ ayen nẹ ayen se vwo ovie ẹkẹvuọvo ovie na cha nokpẹn rẹ erọnvwọn buebun mie ayen.’ Dedena, ihwo da ta: ‘Jọ dia. Avwanre guọnọ ovie!’

Jihova da vuẹ Samuẹl nẹ ọshare ọvo re se Sọl yen cha dia ovie rẹsosuọ. Ọke rẹ Sọl vwọ kọn bru Samuẹl ra vwẹ Ramah, Samuẹl de ku evwri ku uyovwin rọyen ro mudiaphiyọ nẹ a reyerọ vwo mu ovie.

Samuẹl de se ihwo na koko rere o dje ovie kpokpọ rayen vwọ kẹ ayen. Ẹkẹvuọvo ayen rha mrẹ Sọl ọfa-a. Wọ riẹn oboresorọ? Kidie o siomanu vwẹ asan re mu eghwa phiyọ. Ayen vwọ mrẹ Sọl, e de vwo mudia vwẹ uherevie rẹ ihwo na. Sọl gron vrẹ ihwo na ejobi, ọ ki ji vwo erhuvwu. Samuẹl da ta: ‘Ọna yen ohwo rẹ Jihova jẹre.’ Ihwo na ejobi de kperi: ‘E jẹ ovie na sun tọn!’

Ọke ẹsosuọ, Sọl nabọ kerhọ rẹ Samuẹl ji nyupho rẹ Jihova. Ẹkẹvuọvo, o de rhi wene. Kerẹ udje, ofori nẹ o ze izobo vwẹ agbada na-a. O vwo ọke ọvo rẹ Samuẹl vwọ vuẹ Sọl nẹ ọ hẹrhẹ ọyen, ẹkẹvuọvo Samuẹl de kruko. Ọtiọyena, Sọl de re ze izobo na komobọ. Die yen Samuẹl ru kpahen ẹdia nana? Ọ da vuẹ Sọl: ‘Diesorọ wo rhe nene urhi rẹ Jihova-a?’ Sọl yono nẹ echobọ rọyen na?

Ọyena vwọ wan nu, Sọl de nene ihwo rẹ Amalẹk phi ofovwin, Samuẹl da vuẹ nẹ ọ ghwọrọ kemu kemu ejobi. Ẹkẹvuọvo Sọl da yanjẹ Ovie Agag vwo. Jihova da vuẹ Samuẹl: ‘Sọl chukoku vwe, ọ kerhọ kẹ vwẹ-ẹ.’ Ọnana da Samuẹl mamọ, ọ da vuẹ  Sọl: ‘Kidie nẹ wo nyupho rẹ Jihova na-a, ọ cha vwẹ ovie ọfa vwo wene uwe.’ Samuẹl vwo kuomarhẹriẹ nẹ ọ yanran, Sọl da yọnrọn ewun rẹ Samuẹl, ewun na da bẹre. Samuẹl da vuẹ: ‘Jihova reyọ uvie na nẹ obọ wẹn re.’ Jihova cha vwẹ uvie na vwọ kẹ ohwo ọfa ro vwo ẹguọnọ vẹ oshọẹdjẹ rọyen.