Yehova aanaavaha aIsarayeli makhulupale wira yaahooleleke, masi awo yamphavela mwene. Awo yaahimuleela Samuweli wira: ‘Maloko otheene aakhalana mamwene aya. Ni hiyo-tho nimphavela okhalana’. Samuweli aahoona wira eyo khahiyo yaari etthu yooloka, nto aahimuleela Yehova mwaha owo. Yehova aakhunle wira: ‘Atthu awo khanookhottani nyuwo. Anikikhootta miyo. Mwaaleele wira anoowerya okhalana mwene, masi mwene owo onimwaavekelaka itthu sinceene’. Hata vari siiso, atthu yaahaakhula wira: ‘Nnaari! Hiyo nnimphavela mwene!’

Yehova aahimuleela Samuweli wira mulopwana aitthaniwa Sawuli taarowa okhala mwene oopacerya. Okathi Sawuli aaronwe awe omuxukurya Samuweli oRamá, Samuweli aahimuthanla Sawuli okhala mwene ni aahimuhela makhura mmuruni.

Muhoolo mwaya, Samuweli aahiwiitthana aIsarayeli otheene wira owooniherye mwene aya musya. Masi awo khiyamphwannye Sawuli opuro ole. Nyuwo munnisuwela nthowa naya? Nthowa noowi Sawuli aarimwiipitha. Nuumala omphwanya Sawuli, atthu awo yaahimukumiherya ota eriyari ya atthu. Sawuli aari oorakamexa waavikana atthu otheene, ni aari ootepexa oreera. Samuweli aahihimya wira: ‘Munweheke ola Yehova omuthanlale awe’. Atthu otheene yaahikhuwela so: ‘Mwene akhaleke wa mahiku otheene!’

Wanipacerya Mwene Sawuli aaninwiriyana Samuweli ni aanimwiiwelela Yehova. Masi muhoolo mwaya aahirukunuxa murima awe. Mwa ntakiheryo, mwene kheemiheriwa ovaha mikuttho. Nihiku nimosa, Samuweli aahimuleela Sawuli wira omulipeleleke ophiya, masi Samuweli aahipisa vakhaani. Nto Sawuli aahivaha mikuttho mmansawe. Samuweli oonenle sai? Owo aahimuleela Sawuli wira: ‘Nyuwo khammwiiwelenle Yehova’. Niireke Sawuli aahilokiherya mweettelo awe?

Muhoolo mwaya, okathi Sawuli aaronwe awe owana ni atthu a wAmaleeki, Samuweli aahimuleela wira owiive atthu otheene. Masi  Sawuli khaamwiivale Mwene Agagi. Yehova aahimuleela Samuweli wira: ‘Sawuli ookinyanyala, owo khokiwiriyanne’. Samuweli aahiriipiwa murima vanceene ni aahimuleela Sawuli wira: ‘Okhala wira nyuwo moohiya omwiiwelela Yehova, owo onrowa omuthanla mwene mukina’. Vaavo Samuweli aarukununwe awe wira aroweke, Sawuli aahivara nlaya na Samuweli mpakha okhereya. Nuumala-vo, Samuweli aahimwiirela wira: ‘Yehova ookhera omwene anyu’. Yehova aarowa onvaha omwene mutthu mukina yoowo aarowa omphentaka ni omwiiwelela.