Jehovah efa nan̈amia Israelita aby io pitsara hitariky iro, fa panjaka ndraiky raha tiandro. Iro nivolan̈a tamy Samoela: ‘Misy panjaka aby firenena jiaby, zahay koa mba mila.’ Tsy tiany Samoela raha zen̈y, ke izy nivavaka tamy Jehovah. Jehovah nivolan̈a taminany: ‘Tsy anao tsy tiandro fa zaho! Volàn̈a amindro fa iro mety mahazo panjaka, fa ho maro be rahandro halainy panjaka io.’ Fa olo aby io nivolan̈a: ‘Zahay tsy mijery zen̈y. Zahay mila panjaka!’

Jehovah nivolan̈a tamy Samoela fa Saoly an̈arany lelahy araiky nifidiny hatao panjaka. Saoly koa fa nandeha namangy Samoela ta Rama tan̈y, tamy zen̈y Samoela nan̈osotro menaka tamy lohanany, man̈ambara fa izy panjaka.

Navoriny Samoela amy zay Israelita jiaby, izy han̈aboaka iro panjakandro vaovao io. Tsy hitandro Saoly tamy zen̈y. Hainao taia izy? Izy nisitriky tan̈atiny entan̈a. Hitandro fo izy tamy farany, ke nindesindro niboaka, baka io nirahindro nitsangana tan̈ivony vahoaka. Izy farany lava taminolo jiaby, sady zatovo. Samoela nivolan̈a: ‘Io edy olo nifidiny Jehovah e!’ Vahoaka aby io nivolan̈a: ‘Ho lava havilaoman̈a panjaka!’

Nitandren̈y Samoela ndreky nan̈araka volan̈a Jehovah Saoly tamy voanalohany. Fa niova izy tafara. Tandraraiky izy nan̈ano soron̈o taminy alitra, kanefa panjaka tsy mahazo man̈ano zen̈y. Samoela efa nivolan̈a taminany izy mila miambin̈y. Fa Saoly mbala nan̈ano soron̈o io fo, fotony ela Samoela vo navy. Ho Samoela taminany: ‘Adala anao tsy nan̈araka volan̈a Jehovah.’ Mba nan̈ova jery edy ma Saoly tafaranio?

Nandeha niady taminy Amalekita Saoly tafara tatỳ. Samoela nan̈iraka izy hamono olo jiaby tan̈y. Fa Agaga panjakany Amalekita tsy nivoneny Saoly. Jehovah nivolan̈a tamy Samoela: ‘Saoly efa tsy man̈araka raha volan̈oko foeky.’ Nalahelo mare Samoela, ke ho izy tamy Saoly: ‘Hifidy panjaka hafa Jehovah, fotony anao efa tsy  man̈araka volan̈anany.’ Nandeha Samoela, fa Saoly nan̈antsory lambanany, ke naito raha io. Samoela nivolan̈a taminany: ‘Hitosany Jehovah karaha io koa fanjakan̈anao.’ Hamiany Jehovah olo hafa tia izy ndreky man̈araka volan̈anany izio.