Yehofa ŵapele Ayisalayeli ŵakwelusya kuti ŵalongoleleje, nambo jemanjaji ŵasakaga mwenye. Mwamti ŵamsalile Samuyele kuti, ‘Mitundu josope jakutusyungulila jikwete acayimwene, m’wejisoni tukusaka mwenye.’ Samuyele jwayiweni kuti Ayisalayeliŵa ali ŵakulemwa, m’yoyo, jwapopesile kwa Yehofa kumsalila nganiji. Yehofa jwatite kwa jwalakwe, ‘Ŵanduŵa ngaŵa kuti akumkana mmwejo, nambo akungana une. Mwasalile kuti yili yakomboleka kola mwenye, nambo mwenyejo jicisakaga yindu yejinji kwa jemanjajo.’ Atamose kuti Yehofa ŵasasile yeleyi, nambo ŵanduwo ŵatite, ‘Pangali cakusawusya, m’weji tukusaka mwenye basi.’

Yehofa ŵamsalile Samuyele kuti Sauli ni jucaŵe mwenye jwandanda jwa Ayisalayeli. Sauli paŵajawile kukuwonegana ni Samuyele ku Rama, Samuyele ŵamsagwile jwalakwe kuŵa mwenye mwakumtaga mawuta mumtwe.

Kaneko Samuyele ŵasongenye Ayisalayeli kuti ŵalosye mwenye jwawo jwasambano. Nambo Sauli nganawonekaga. Ana mkumanyilila ligongo lyakwe? Jwalakwe jwajuŵile pasikati pa ndundu syakwe. Ali ampatile Saulijo, ŵamjigalile kuŵaliji ŵanduwo ni ŵamjimice pasikati pa ŵanduwo. Sauli jwaliji jwamlewu kupunda jwalijose, soni jwaliji jwakuwoneka cenene. Samuyele jwatite, ‘Am’weni mundu jwamsagwile Yehofa?’ Ni ŵanduwo ŵagumisile kuti, ‘Akole umi welewu mwenye!’

Kundanda Mwenye Sauli jwampikanilaga Samuyele soni Yehofa. Nambo kaneko jwalakwe jwacenjile. Mwambone, mwenye nganasosekwaga kupeleka mbopesi. Nambo pandaŵi jine, Samuyele ŵamsalile Sauli kuti amlinde mpaka pacayice kuti apelece mbopesi, nambo Samuyele nganayika mwacitema. M’yoyo Sauli jwapelece mbopesijo jika. Ana Samuyele jwatesile cici? Jwalakwe ŵamsalile kuti, ‘Msosekweje kumpikanila Yehofa.’ Ana Sauli ŵalijiganyisye cilicose pa yakulemwa yakweyi?

Kaneko Sauli ali apite kukumenyana ni Aamaleki, Samuyele ŵamsalile Sauli kuti akawulaje ŵandu wosope. Nambo Sauli jwaganisisye kuti akam’wulaga Mwenye Agagi. Yehofa ŵamsalile Samuyele kuti, ‘Sauli andesile une soni ngakumbikanila.’ Samuyele jwatumbile mnope mwamti ŵamsalile Sauli kuti, ‘Ligongo lyakuti mlesile kumpikanila Yehofa, jwalakwe  cacisagula mwenye jwine.’ Samuyele paŵagalawukaga kuti ajawuleje, Sauli jwamkamwile Samuyele mwamti cakuwala cakwe cakusa capapwice. Samuyele jwamsalile Sauli kuti, ‘Yehofa camsumule ucimwene.’ Ucimwenewo ucipelecedwa kwa mundu jwacacimnonyela soni kumpikanila Yehofa.