Yave wuvana bana ba Isaeli mimfundusi mikwikama mwingi kuba twadisa, vayi bawu baba tomba ntinu. Diawu bawu bakambila Samuel: ‘Befu mvitu ntinu tuntombila kibila zitsi zyoso badi na mintinu miawu. Samueli wumona ti bawu babaka makani mambi, diawu kasambidila mu matedi dyambu beni. Yave wunkamba: ‘Bawu basa kumanga ko ngyewu, vayi minu bammanga. Bawu balendi kuawu kubaka ntinu, vayi wubakamba ti ntinu beni wala tomba bawu bavanga mambu mawombo.’ Angi bawu bavutudila: ‘Twisi kuma tatubukila ko, vayi befu Ntinu tuntomba!’

Yave wukamba Samueli ti dibakala baba tedilanga Sauli nandi wunkwiza ba Ntinu wutheti wu bana ba Isaeli. Kilumbu kinkaka bo Sauli kayenda kwe tala Samueli waba kalanga ku divula di Lama, Samuel wumbyeka Ntinu ayi wulemba ku ntu’andi mafuta.

Buvyokila thangu, Samueli wutela bana boso ba Isaeli mwingi kaba monisa Ntinu wumona. Vayi basa mona ko Sauli mu bibwangu byoso. Ngye zebi mu kibila mbi? Kibila nandi wuba wuswama. Bo bammona, bawu bantwala ku nganda ayi nandi wuba wutelama va khati’awu. Sauli wuluta ntela mu batu boso baba vana, ayi wuba beni kitoko ki nyitu. Bosi ko Samueli wutuba: ‘Talanu mutu Yave kasola.’ Batu boso batenduka: ‘Tunangika ntinu!

Bo Sauli katona kuyala, nandi wuba kuwilanga Samueli ayi waba tumamananga Yave. Buvyokila thangu nandi wuyiza balula mavanga. Mintinu mu thangu beni basa ba ko nswa wu kuvika mikhayilu. Boti mikhayilu mi kuvika nandi kafweti telimina nganga Nzambi voti mbikudi wu Yave. Kilumbu kimweka Sauli wutumisa Samueli mwingi kiza vika mikhayilu, Samueli wunkamba mwingi katedimina. Angi Sauli kasa telimina ko diawu kabakila makani ma kuvika mikhayilu beni nafeka. Mambu mbi Samueli kavanga? Nandi wukamba Sauli: ‘Ngye wisa tumimina ko Yave.’ Sauli khanu wulonguka mu matedi zinzimbala zyandi!

Bo Sauli kayenda kunwana mvita na basi Amaleki, Samueli wukamba Sauli kavonda batu boso. Vayi Sauli wubaka makani ma kuvonda  bankaka ayi wubika Angali ntinu wu Amaleki. Diawu Yave kakambila Samueli: ‘Sauli kasyala be kukhuwila ko.’ Samueli wuba beni mu kyunda, ayi nandi wukamba Sauli: ‘Bo be khambu tumamana Yave, diawu nandi kankwiza sodila ntinu wunkaka.’ Bo Samueli katona kubasika ku nganda, Sauli wutitika mu kikhutu kyandi ayi kyawu kikhakuka. Vayi Samueli wukamba Sauli: ‘Yave makhakuna kintinu kyaku. Nandi wala kivana kwidi mutu wunkaka wala kunzola ayi wala kuntumamana.’