Gulí Jiobá caadxi israelita para gácacaʼ juez ne gábicaʼ guidxi que xi naquiiñeʼ gúnicaʼ, peru guidxi que canabaʼ gapa ti rey. Ngue runi gúdxicabe Samuel: «Guiráʼ ca guidxi ca nápacaʼ ti rey, laadu laaca racaláʼdxidu gápadu tobi». Qué ñuulaʼdxiʼ Samuel ni canábacabe que. Ngue runi biʼniʼ orarbe Jiobá ne laa bicabi laabe: «Cadi lii nga cucaanáʼ guidxi ca, naa nga cucaanácabe. Gudxi laacabe zanda gápacabe ti rey, peru rey ca zanabaʼ laacabe stale cosa». Neca zaqué guidxi que guníʼ: «¡Zaa! ¡Racaláʼdxidu gápadu ti rey!».

Óraque gudxi Jiobá Samuel, ti hombre ni láʼ Saúl nga chigaca primé rey stiʼ Israel. Ora guyé Saúl ra nuu Samuel ndaaniʼ guidxi Ramá, biʼniʼ ungir Samuel laabe ra bindaateʼ aceite galaa íquebe para guihuinni laabe nga rey.

Despué bichiña Samuel guiráʼ ca israelita para guluiʼbe laacaʼ rey cubi sticaʼ. Peru qué guidxélacabe Saúl. ¿Nannuʼ xiñee la? Purtiʼ nucaachilube. Ora bidxélacabe laabe, guleecabe laabe de raqué ne bizuhuaacabe laabe galaa guidxi que. Jma nasoobe que guiráʼ binni ne guizáʼ guapu laabe. Guníʼ Samuel: «Laguuyaʼ ndiʼ nga binni ni gulí Jiobá». Ora biʼyaʼ ca binni que laabe biéchecaʼ ne bicaacaʼ ridxi: «¡Viva rey stinu!».

Dxi bizulú biʼniʼ mandar Saúl biʼniʼ guiráʼ ni gudxi Samuel laa ne bizuubaʼ stiidxaʼ Jiobá. Peru despué maʼ qué ñuni ni. Ti biaje, gudxi Samuel laabe cuézabe laa para guni sacrificiu. Neca rey laabe qué zanda diʼ gúnibe ni. Cumu biiyabe candaa Samuel la? ngue runi bizulube bíʼnibe sacrificiu que. ¿Xi biʼniʼ Samuel yaʼ? Gudxi laabe: «Naquiiñeʼ nuzuubaluʼ stiidxaʼ Jiobá, peru qué ñúniluʼ ni». ¿Ñee ziene Saúl naquiiñeʼ guzuubaʼ stiidxaʼ Jiobá la?

Despué, yetindené Saúl ca amalequita, ne gudxi Samuel laabe guutibe guiráʼ xixecaʼ. Peru qué niná Saúl ñuuti rey Agag. Ngue runi gudxi Jiobá Samuel: «Maʼ bisaana Saúl naa, maʼ qué ruzuubabe stiidxaʼ». Nabé triste guyuu Samuel, nga runi gúdxibe Saúl: «Zabí Jiobá sti rey purtiʼ lii maʼ qué ruzuubaluʼ stiidxabe». Ora bidxiideche  Samuel, biruuxhaʼ Saúl laabe dede gucheza xhábabe. Gudxi Samuel laabe: «Zacaca zaxha Jiobá reinu ca lii». Ndiʼ riníʼ zudii Jiobá reinu ca sti binni ni dxandíʼ nadxii laa ne ruzuubaʼ stiidxabe.