Jehová goloʼ jueces par nasanir nisló israelitas, per layibu goniiny ñapyibu toib rey. Israelitas gochyibu Samuel: «Guirá gudx ni nagoo lóono napyibu reyes. Lóodo láaca raniiny gapdo toib rey». Samuel gosac que diti láani ngú ni cayonyibu, por ngú goninébu Jehová. Jehová góoch láabu: «Diti looy cabeʼyibu tiplad. Naʼ ngú ni cabeʼyibu tiplad. Góoch layibu que labúu sapyibu toib rey, per rey reʼ sanab xidal cós layibu». Ná scú, gudx Israel goniʼ: «¡Sanac, per nainy gapdo toib rey!».

Jehová gochbu Samuel que toib buñguieeu ni laa Saúl sadxin sac primer rey xtuny Israel. Órni Saúl goyee goyguen Samuel gudx Ramá, Samuel bigotz aceity guicbu, ndeʼ biduidy diitz que Saúl gac rey xtuny Israel.

Después Samuel bitop guirá israelitas par bislooybu biinreʼ chú ngú buñguieeu ni gony mandary layibu. Per diti bidzelyibu Saúl. ¿Nanlo xigony la? Portín bicachlanbu lad tipnés cós. Órni bidzelyibu Saúl, binéyibu Saúl galay gudx. Saúl godudyzobu guic guirá buñ ni goyoʼ cú né nigolú móz gócbu. Samuel góoch layibu: «Colguibiʼ buñguieeu ni Jehová ma golú». Buñ bicaʼ rudx: «¡Gonyxiroʼno rey!».

Primer, Saúl bisobbu Samuel né bisobbu Jehová, per después ma yaca. Ló dzúcu toib rey diti gop permís par ñony toib galrrascad par Jehová. Toibtica dzú, Samuel gochbu Saúl: «Golés dada guidxina». Per Samuel nigolú goclabu, né por ngú Saúl bixacladx né bunybu toib galrrascad par Jehová. ¿Xí buny Samuel ór cú? Samuel gonabdiitz láabu: «¿Xigony diti bisoblo Jehová?». ¿Goyoʼ xcalrrien Saúl la?

Después órni Saúl goyee cualó buñ amalequitas, Samuel gochbu Saúl que non guigaitybu guiráxadit buñ de lagarycu. Per Saúl diti bigaitybu rey Agag. Jehová gochbu Samuel: «Saúl ma bisian naʼ né ma diti rasobbu naʼ». Samuel nigolú goyoʼ nabann, né gochbu Saúl: «Looy diti rasoblo ni ná Jehová, por ngú sabúbu  stoib rey». Samuel goyoʼ néz né see, Saúl gonás ñeʼ xhap Samuel dada bichésbu láani. Ór cú Samuel gochbu Saúl: «Jehová sabeʼ looy ló galmandary». Ndeʼ biduidy diitz que Jehová sagoʼbu stoib buñguieeu ni gony mandary xalagary Saúl, toib buñ ni gandxiʼ né guisob láabu.