Jehovah owaco bot Camuel ni: ‘Cit i ot pa Yece. Abiyero wode acel ma bidoko kabaka me Icrael.’ Pi meno, Camuel ocito i ot pa Yece. I kare ma en oneno awobi madit loyo, otamo ni: ‘Ada man aye ngat ma Jehovah oyero.’ Ento Jehovah owaco bot Camuel ni meno aye pe en. Jehovah owaco ni: ‘An aneno gin ma tye i cwiny dano, ento pe kit ma kome nen kwede keken.’

Yece okelo awobene abicel mukene bot Camuel. Ento Camuel owacci: ‘Jehovah pe oyero ngat mo i kingi. Pe dong itye ki awobe mukene?’ Yece ogamo ni: ‘Awobi acel pud odong, matidine, nyinge Daudi. En tye woko ka gwoko romina.’ I kare ma Daudi obino, Jehovah owaco ki Camuel ni: ‘Man aye en!’ Camuel oonyo moo i wi Daudi, kun wire me bedo kabaka me Icrael.

I nge kare mo, jo Icrael gucito ka lweny ki jo Piliciti, ma onongo gitye ki twon oluma mo ma nyinge Goliac ma lwenyo pigi. Nino ki nino, Goliac obedo ka nywaro jo Icrael. En odange matek ni: ‘Wucwala dano mo wek obin ka lweny kweda. Ka en oloyo, wabidoko luticwu. Ento ka an aloyo, ci wubibedo luticwa.’

Daudi obino i gony pa lumony me Icrael ka kelo cam pi omegine ma gucito i mony. En owinyo lok pa Goliac ci owaco ni: ‘An abicito ka lweny kwede!’ Kabaka Caulo owacci: ‘In  pud latin awobi mamwa.’ Daudi ogamo ni: ‘Jehovah bikonya.’

Caulo otemo ruko Daudi ki jami lwennye, ento Daudi owacci: ‘Pe atwero lweny ma arukke ki jami-ni ducu.’ Daudi okwanyo latangdiyone ci ocito i kulu. En oyero gweng abic ma olunnge mapwot ci oketogi i kicaane. Ci Daudi ongweco tung bot Goliac. Twon oluma-ni odange ni: ‘Bin bota, latin awobi. Abimiyo ringo komi bot winyo me polo ki bot lee tim.’ Daudi pe obedo lwor. En oredo matek ni: ‘In ibino bota ki pala lucwan ki tong, ento an abino boti i nying Jehovah. Pe itye ka lweny i komwa, ento itye ka lweny i kom Lubanga. Dano ducu gibineno ni Jehovah tek loyo pala lucwan nyo tong. En bimiyo wun ducu i cinga.’

Daudi okwanyo gweng oketo i latangdiyone, ci obayo ki tekone ducu. Ki kony pa Jehovah, gweng ma en obayo-ni ocelo ci odonyo i tur nyim Goliac. Twon oluma-ni opoto woko piny i ngom. Jo Piliciti ducu guringo woko me laro kwogi. In tika igeno Jehovah, calo Daudi?