Yéhôva a kal Samuel le: ‘Kee i ndap Yésé. Lok yé yada i ga ba kiñe Israel.’ Jon Samuel a kee i ndap Yésé. A tehe bañ man wé munlôm nu mañ, a hoñol le: ‘Nunu nyen Djob a mpohol.’ Ndi Yéhôva a kal Samuel le nye bé nu. Yéhôva a kal ki le: ‘Me me ntehe ñem mut, ha ndik bé yom i nene i mis.’

Yésé a lona bilok gwé bipe bisamal bisu bi Samuel. Ndi Samuel a kal le: ‘Yéhôva a ntep bé to wada ipôla yap. Baa u gwé bon bôlôm bape?’ Yésé a timbhe nye le: ‘Ñ, me ngi gwé wada, man wem munlôm nu sôk mbus le David. A yé tééda mintômba nwem.’ Ngéda David a bi lo, Yéhôva a kal Samuel le: ‘Nye nu!’ Samuel a kôp David môô i ngii ño, le nyen a’ ba kiñe Israel i i noñ.

Mbus ndék ngéda, Lôk Israel i jôp i gwét lôñni Lôk Filistia, i i bééna mpémba mut gwét wada le Gôliat, nu a bé jo gwét inyu yap. Hiki kel, Gôliat a bé nol Lôk Israel hiol, a londok le: ‘Ni ti me mut nu a ga jôs me. Ibale a mbép me, di ga yila minkol minan. Ndi ibale men me mbép nye, ni ga ba minkol nwés.’

Lôk nyañ i David i bé sônda mu ntôñ gwét u bon ba Israel. David a lo ti bo bijek; a nok i jam Gôliat a bé pot. Ni David a kal le: ‘M’a jôs nye!’ Kiñe Saulô a kal le: ‘U yé ndik mañge.’ David a timbhe nye le: ‘Yéhôva a ga hôla me.’

 Saulô a bé gwés le David a bôñôl bijôl gwé bi gwét, ndi David a kal le: ‘M’a la bé me bôñôl gwo.’ David a bi yoñ ndamb yé, a ke i lép. A tep minsenda mi ngok mintan, a ha nwo i bot yé. Ni David a ke ngwéé, i boma Gôliat. Mpémba mut u lond le: ‘Loo hana, a mañge. Ndi m’a ti dinuni yak binuga bi bikai minsôn nwoñ.’ David a bé kon bé woñi. A timbhe Gôliat le: ‘We u nlo i meeni ni pansoñ, ni likoñ, ndi me, me nlo i weeni i jôl li Yéhôva. Bés bé bon u yé jôs; ndi u yé jôs Djob. Hiki mut a’ ke i tehe le Yéhôva a nloo pansoñ ni likoñ ngui, huum! A’ sem bébobasôna i moo més.’

David a ha ngok i ndamb, a leñ yo ni ngui yé yosôna. Ni mahôla ma Yéhôva, ngok i bi ke, i jôp Gôliat ikétékété mbom. Gôliat a kwo, a wo. Bon ba Lôk Filistia ba ôt ngwéé inyu péyés biniñ gwap. Baa u mbôdôl Yéhôva ñem kiki David?