Sinabi ni Jehova ki Samuel: ‘Magduman ka sa harong ni Jesse. Saro sa mga aki niyang lalaki an magigin sunod na hadi kan Israel.’ Kaya nagduman si Samuel. Kan mahiling niya an pinakamatuang aki, naisip niya: ‘Siguradong an hoben na lalaking ini an pinili ni Jehova.’ Pero sinabi ni Jehova ki Samuel na bako ini. Sabi ni Jehova: ‘An pighihiling ko iyo an nasa puso nin tawo, bako an pangluwas na itsura.’

Ipinahiling ni Jesse ki Samuel an anom pa niyang aking lalaki. Pero nagsabi si Samuel: ‘Mayo sainda an pinili ni Jehova. May iba ka pang aking lalaki?’ Nagsimbag si Jesse: ‘May saro pa, an kangudhan, si David. Pero wara siya digdi ta nag-aataman kan mga karnero.’ Pag-abot ni David, sinabi ni Jehova ki Samuel: ‘Siya na!’ Binubuan ni Samuel nin lana an payo ni David para lahidan ini na magin sunod na hadi kan Israel.

Nagkaigwa nin giyera an mga Israelita asin mga Filisteo. May higanteng parapakilaban an mga Filisteo na an pangaran Goliat. Aroaldaw kaining pigkakantiyawan an mga Israelita. Nagkurahaw ini: ‘Magpili kamo nin lalaking malaban sako. Pag manggana siya, magigin uripon nindo kami. Pero kun ako an manggana, magigin uripon mi kamo.’

Nagduman si David sa kampo kan hukbo kan mga Israelita para darahan nin kakanon an mga tugang niyang suldados. Nadangog niya si Goliat asin nagsabi siya: ‘Lalabanan ko siya!’ Nagsabi si Hading Saul: ‘Pero aki ka pa.’ Nagsimbag si David: ‘Tatabangan ako ni Jehova.’

 Ipinasulot ni Saul ki David an saiyang kalasag, pero nagsabi si David: ‘Dai ako makakalaban kun sulot ko ini.’ Kinua ni David an lagpitaw niya dangan nagpasiring sa sapa. Nagpili siya nin limang makinis na gapo tapos ilinaag iyan sa saiyang bag. Nagdalagan siya pasiring ki Goliat. Nagkurahaw an higante: ‘Rumani ka digdi, ikang sadit na aki ka. Ibabahog taka sa mga gamgam saka sa mga layas na hayop.’ Dai natakot si David. Nagkurahaw man siya: ‘Nagdigdi ka na may darang espada saka budyak, pero nagdigdi ako sa ngaran ni Jehova. Siya an kinakalaban mo, bako kami. Mahihiling kan gabos digdi na mas makapangyarihan si Jehova kisa sa espada o budyak. Sa tabang niya, madadaog mi kamo.’

Ilinagpitaw ni David nin todo an sarong gapo. Sa tabang ni Jehova, tuminama iyan asin luminubong sa angog ni Goliat. Nagadan an higante asin natumba sa daga. Nagdurulagan an mga Filisteo. Nagtitiwala ka daw ki Jehova arog kan ginibo ni David?