Zeova ti dir Samyel: ‘Al kot lakaz Zese. Enn son garson pou vin dezyenm lerwa Izrael.’ Alor Samyel ti al kot lakaz Zese. Ler i ti vwar premye garson Zese, i ti mazinen: ‘I bezwen sa enn.’ Me Zeova ti dir Samyel ki i pa sa enn ki pou vin lerwa. Zeova ti dir: ‘Mon vwar sa ki dan leker en dimoun, pa zis sa ki i ete an deor.’

Zese ti anmenn ankor sis lezot garson kot Samyel. Me Samyel ti dir: ‘Zeova pa’n swazir okenn parmi zot. Eski ou annan lezot garson?’ Zese ti dir: ‘Mon annan ankor enn, sa enn pli zenn, David. I deor pe pran swen avek mon bann mouton.’ Ler David ti antre, Zeova ti dir Samyel: ‘Li menm li!’ Samyel ti vid delwil lo latet David e apwent li konman lerwa Izrael.

Pli tar, bann Izraelit ti pe lager avek bann Filisten. Bann Filisten ti annan en gerye ki ti en zean. Sa zean ti apel Golyat e i ti lager pour zot. Tou le zour, Golyat ti vin boufonn bann Izraelit. I ti kriye: ‘Anvoy en zonm ki kapab lager avek mwan. Si i gannyen, nou pou vin zot lesklav. Me si mwan ki gannyen, zot pou vin nou lesklav.’

David ti’n vin anmenn manze pour son bann frer ki ti bann solda dan kan larme bann Izraelit. I ti tann Golyat e i ti dir: ‘Mon pou lager avek li!’ Lerwa Sail ti dir: ‘Ou zis en pti garson.’ David ti reponn: ‘Zeova pou ed mwan.’

 Sail ti anvi David i servi son lenz lager me David ti dir: ‘Mon pa kapab lager dan sa lenz.’ David ti pran son fles e al kot larivyer. I ti anmas senk ros e met zot dan son sak. Apre David ti tay kot Golyat. Sa zean ti kriye: ‘Vin isi pti garson. Mon pou donn ou lekor avek bann zwazo ek zannimo sovaz.’ David pa ti per. I ti kriye: ‘Ou pe vin avek en lans ek lepe me mwan mon vin kot ou o non Zeova. Ou pa pe lager avek nou me ou pe lager avek Bondye. Tou dimoun ki la pou vwar ki Zeova i pli for ki en lans oubyen lepe. I pou fer nou ganny laviktwar lo zot tou.’

David ti met en ros dan son fles e anvoy li avek tou son lafors. Avek led Zeova, sa ros ti tap zis lo fron Golyat. Sa zean ti tonm sek ater. Apre bann Filisten ti taye. Eski ou annan konfyans dan Zeova parey David?