Jehova seit zum Samuel: «Gang zum Isai. Eine vo sine Söhn wird de nöchscht König vo Israel.» De Samuel macht sich uf de Weg. Wo er de ältischt Sohn vom Isai gseht, denkt er: «De jung Maa, dee muess es sii.» Aber Jehova seit zum Samuel: «Nei, dee isch es nid. Wil ich gseh nämlich nid nume, wie en Mensch usgseht, sondern ich gseh, wie s Herz vomene Mensch isch.»

De Isai stellt em Samuel no sechs anderi Söhn vor. Aber de Samuel seit: «Nei, Jehova het keine vo ihne usgwählt. Hesch nid no anderi Söhn?» De Isai antwortet: «Min Jüngscht, de David, fehlt no. Er passt grad uf d Schaf uf.» Wo de David inechunnt, seit Jehova zum Samuel: «Das isch er!» Denn nimmt de Samuel e chli Öl und giessts em David über de Chopf. Eso tuet er ihn zum nöchschte König vo Israel salbe.

E chli später füehred d Philischter Chrieg gege d Israelite. Si hend en riisige Soldat, er heisst Goliath. Jede Tag lacht er d Israelite us. Er rüeft: «Schicked öpper da here, wo gege mich kämpft. Wenn er gwünnt, werded mir eui Diener. Wenn aber mir gwünned, denn werded ihr üsi Diener.»

De David gaht is Chriegslager vo de Israelite. Er bringt Esse für sini Brüedere, wo dört Soldate sind. Wo er de Goliath ghört, seit er: «Ich wird gege ihn kämpfe.» De König Saul seit: «Aber du bisch doch nume es Chind.» De David antwortet ihm: «Jehova wird mir helfe.»

De Saul nimmt sini Rüschtig und leit si em David a, aber de David seit: «Mit dere cha ich nid kämpfe.» Defür nimmt er sini Steischlüdere, gaht zumene Bach, suecht sich dört füf glatti Stei und versorgt si i sinere Täsche. Denn rennt er uf de Goliath zue. De Riis schreit: «Chumm da here, Chliine! Ich wird dich de Vögel und de wilde Tier verfüettere.» De David het kei Angscht und git ihm ume: «Du chunnsch miteme Schwert und miteme Speer, aber ich chumme im Name vo Jehova. Du kämpfsch nid gege üs; du kämpfsch gege Gott. Alli, wo da sind, werded gseh, dass Jehova vil mächtiger isch als es Schwert oder en Speer. Dank ihm werded mir gwünne.»

De David leit en Stei i sini Schlüdere und schwingt si eso fescht, wie er nume cha. Mit de Hilf vo Jehova trifft er de Goliath mit voller Wucht zmizt i d Stirn und de Riis gheit tot um. Wo d Philischter das gsehnd, renned si devo. Vertrausch du au eso fescht uf Jehova wie de David?