Soʼu wanee kaʼi, müshi Jeʼwaa nümüin Samuel: «Puʼuna nipialuʼumüin Jesé. Taneeküin wanee wayuu naʼakajee na nüchonniikana Jesé süpüla nuluwataainjachin saaʼu Israel». Nüntapa Samuel nipialuʼumüin Jesé, niʼraka chi nüchon epayaakai. «Niainjaʼa aneekünüin chii», nümaka. «Nnojoishi niain taneeküin. Nnojotsü shiain jülüjain taaʼin tü shiʼrakat wayuu, shia jülüjaka taaʼin tü suluʼukat saaʼin», müshi Jeʼwaa nümüin Samuel.

Nuunejitka Jesé aipiruashii nüchonnii süpüla neʼraajüinjachin Samuel. «Nnojoishi yaain naʼaka chi nüneekakai Jeʼwaa. ¿Naya neʼe na püchonniikana naainua?», nümaka Samuel. Nusoutaka Jesé: «Nnojo, ichaa chi emülieekai sünain arüleejaa anneerü, David nünülia». Shiasaʼa nüntinnapa David. «Chii, nia chi taneekakai», nümaka Jeʼwaa nümüin Samuel. Niʼyotoko Samuel seita saaʼu nikii David süpüla niainjachin aluwataain mapa saaʼu Israel.

Mapa, peʼipolooshii na israeliitakana namaa na filisteokana. Eejachi wanee filisteo miyoʼu maʼin jee atüjashi maʼin atkawaa, Goliat nünülia. Nujuyaajüin Goliat na israeliitakana kaʼiwai. «Jüntira tamüin wanee wayuu nütkaai tamaa. Nükanajüle taya, jüchepchieena waya. Jee takanajüle nia, wachepchieena jia», nümaka namüin.

Nüntaka David eejanale jutkatüin na surulaat israeliitakana; eʼikajaashi nia neküin na nuwalayuukana. Naapaka joo David nünüiki Goliat. «Tayeechi atkaaka nümaa», nümaka David. Nusoutaka Saúl nümüin David: «Nnojo, jintüiyüiya pia». «Nükaaliinjeechi taya Jeʼwaa», nümaka David.

 Naapüin Saúl nümüin David tü nüsheʼin nütkaayakat. «Nnojo, nnojoleerü taʼatüin tanain, jawatüsü maʼin», nümaka David nümüin. Naapaain David wanee junaaya, nuʼunaka eemüin wanee luwopu. Nükotchojoko jaʼraisü ipa koʼoyoojusü, nünaajaaka shia suluʼu naaʼawalia. Nürütkaaka David nünainmüin Goliat. «Jalaichi toʼutai paaʼin. Shikaiwa pia tü wüchiikalüirua», nümaka Goliat nümüin David. Nusoutaka David sümaa nnojolin mmoluin nia: «Antüshi pia teʼipomüin sümaa chajaruuta jee jatü. Aluʼusaʼa tayakai, atkaainjachi taya pümaa sükajee nünülia Jeʼwaa. Nnojoishi atkaain pia wamaa, nia pütkaaka amaa Maleiwa. Natüjaweerü aaʼu napüshuaʼa na wayuu yaakana sünain pülashin maʼin Jeʼwaa suulialeʼeya wanee chajaruuta jee jatü. Naapeena jia wajapuluʼu».

Niʼitaaka David wanee ipa suluʼu tü nujunaayasekat jee nujutaka shia emetut maʼin nooʼomüin Goliat. «Tooj» niʼipoʼunain, «soj» mmoluʼumüin, outaleeshia Goliat. Lotusü maʼin tü ipakat nutuma Jeʼwaa. Neʼrapa tia na filisteokana, apantajaashii naya suulia noʼutunuin aaʼin. Niʼitaain maʼin David naaʼin nünain Jeʼwaa. ¿Jama piakai? ¿Piʼitaainche maʼin paaʼin nünain Jeʼwaa maʼaka naaʼin David?