Jehovah dọna Samuẹli dọmọ: ‘Yì owhé Jẹsse tọn gbè. Dopo to visunnu etọn lẹ mẹ wẹ na yin ahọlu Islaeli tọn he na bọdego.’ Enẹwutu, Samuẹli yì owhé Jẹsse tọn gbè. Whenue e mọ visunnu mẹho lọ, e lẹndọ: ‘Dẹpẹ ehe janwẹ e na yin.’ Amọ́, Jehovah dọna Samuẹli dọ e ma yin omẹ enẹ wẹ emi de. Jehovah dọmọ: ‘N’ma nọ pọ́n awusọhia gbonu tọn poun, ahun mẹ wẹ n’nọ pọ́n.’

Jẹsse sọ plan visunnu etọn ṣidopo devo lẹ wá Samuẹli dè. Amọ́, Samuẹli dọmọ: ‘Jehovah ma de depope to yé mẹ. A sọ tindo visunnu devo lẹ ya?’ Jẹsse dọmọ: ‘E pò mẹdopo, visunnu ṣie pẹvi lọ, Davidi. E to nukunpedo lẹngbọ ṣie lẹ go to danji.’ Whenue Davidi wá, Jehovah dọna Samuẹli dọmọ: ‘Mẹlọ niyẹn!’ Samuẹli sọ kọ̀n amì do ota na Davidi bo gbọnmọ dali de e taidi ahọlu Islaeli tọn he na bọdego.

To ojlẹ de godo, awhàn fọ́n to Islaelivi lẹ po Filistinu lẹ po ṣẹnṣẹn, bọ Filistinu lẹ tindo awhànfuntọ asuka de he nọ yin Goliati. Egbesọegbesọ wẹ Goliati nọ to Islaelivi lẹ ṣanko. E nọ dawhá dọmọ: ‘Mì do sunnu de hlan nado wá hoavùn hẹ mi. Eyin e duto ji e, mí na lẹzun afanumẹ mìtọn lẹ. Ṣigba, eyin yẹn duto e ji, mìwlẹ na lẹzun afanumẹ mítọn lẹ.’

Davidi wá osla awhànpa Islaelivi lẹ tọn mẹ nado hẹn núdùdù wá na mẹdaho etọn lẹ he yin awhànfuntọ. E sè nuhe dọ Goliati te bo dọmọ: ‘N’na hoavùn hẹ ẹ!’ Amọ́, Ahọlu Sauli dọmọ: ‘Eyeo, yọpọvu de poun wẹ a yin.’ Davidi gblọn dọ: ‘Jehovah na gọalọna mi.’

 Sauli tẹnpọn nado do awhànwù etọn na Davidi, amọ́ Davidi dọmọ: ‘N’ma gán do awhànwù ehe bo hoavùn.’ Davidi ze akòtopẹ́ etọn bo yì tọ̀sisa de kọ̀n. E sọ ṣinyan zannu he dídí atọ́n bo bẹ yé do saki etọn mẹ. Enẹgodo, Davidi dlí do Goliati ji. Asuka lọ dawhá dọmọ: ‘Dẹpẹ, wá file. N’na yí olàn towe na ohẹ̀ agahomẹ tọn lẹ po gbekanlin lẹ po.’ Davidi ma dibu. E gblọnna ẹn dọmọ: ‘Hiẹ ja dè e po ohí de po gọna owhán de, ṣigba yẹn ja dè we to oyín Jehovah tọn mẹ. E ma yin míwlẹ wẹ hiẹ to avùnho hẹ, ṣigba hẹ Jiwheyẹwhe. Mẹhe tofi lẹpo wẹ na mọdọ Jehovah dohuhlọn hú ohí po owhán po. Ewọ na jo mìmẹpo do alọ mítọn mẹ.’

Davidi yí zannu dopo do akòtopẹ́ etọn mẹ bo yí huhlọn etọn lẹpo do yìn in gángán. Po alọgọ Jehovah tọn po, zannu he e dlan lọ yì biọ ota Goliati tọn nukọn. Asuka lọ sọ họ́jai do kọmẹ bo kú. To whenẹnu, Filistinu lẹ bẹwezun nado họ̀ngán. Be a nọ dejido Jehovah go, dile Davidi wà do ya?