Jehova wa raera Samuel kutja, ‘Twende konganda yaIsai. Mba toorora umwe wovazandu ve okurira ombara ombe yaIsrael.’ Samuel otja ya koyaIsai. Eye tja muna omuatje we omuzandu otjiveri arire tje ripura kutja, ‘Omuzandu ngwi ongwa toororwa.’ Posiya Jehova wa raera Samuel kutja kangu ri ye. Jehova wa tja: ‘Ami mbi tara momutima womundu, kambuniko yopendje uriri.’

Isai wa eta ovanatje ve ovazandu hamboumwe ku Samuel. Posiya Samuel wa tja: ‘Jehova kaa toorora umwe wawo. Kapena omuatje warwe omuzandu?’ Isai wa tja: ‘Mbina umwe, ingwi ongero, David.’ Indu David tje ya, Jehova wa raera Samuel kutja, ‘Ongu ri ye!’ Samuel wa tirira omaze motjiuru tjaDavid, okumuzika otjombara yaIsrael yoruyaveze.

Kombunda yanao, Ovaisrael va ri notjirwa kuna Ovafilisti, mba ri nomurenaka omunamasa tjinene wena Goliat ngwee ve rwire. Goliat otjaa tenge Ovaisrael eyuva arihe. Eye wa ravaera kutja, ‘Hindeye omurumendu ngu ma ru kuna ami. Indu tja taara, eṱe matu rire ovakarere veṋu. Nungwari tji mba taara, eṋe mamu rire ovakarere vetu.’

David weya kondanda yovarwe vOvaisrael okueta ovikurya komarumbi we mbu va ri ovarwe. Eye wa zuva oviṋa Goliat mbyaa hungire na tja: ‘Ami me mu rwisa!’ Ombara Saul ya tja: ‘Posiya oove okaṱiṱi.’ David we mu zira a tja: ‘Jehova me ndji vatere.’

 Saul wa kondja okupa David ozombanda ze zokurwa, posiya David wa tja: ‘Ami hina okuyenena okurwa nozombanda nḓo.’ David wa toora okakarena ke ai koruramba. Eye wa toora omawe yetano omaheze neye twa mokayaṱu. Tjazumbo David otja tupuka ku Goliat. Goliat wa ravaera kutja, ‘Indjo kanatje. Me yandja onyama yoye kouzera novipuka ovinyondorore.’ David kaa tira. Eye wa zira a tja: ‘Ove mo ndji yendere nengaruvyo nenga, posiya ami me ku yendere mena raJehova. Ove kona okurwa kuna eṱe posiya mo ru kuna Mukuru. Omundu auhe ndino ma munu kutja Jehova omunamasa kombanda yengaruvyo poo enga. Eye me mu yandja amuhe momake wetu.’

David wa twamo ewe mokakarena ke na yumbu nomasa aehe. Nombatero yaJehova, ewe otjira veta Goliat motjipara. Omurenaka wa wira pehi na ṱu. Ovafilisti otjiva tupuka okuyama omiinyo vyawo. Ove u nongamburiro mu Jehova otja David?