Jehova eerire Samueli ũũ: ‘Thiĩ kwa Jesii tondũ mũriũ ũmwe wake nĩwe ũgatuĩka mũthamaki wa Isiraeli.’ Nĩ ũndũ ũcio Samueli nĩ aathiire kwa Jesii. Rĩrĩa onire mũriũ ũrĩa mũkũrũ wa Jesii, eeĩrire ũũ: ‘No nginya akorũo nĩwe ũyũ.’ No Jehova akĩmwĩra atĩ ũcio tiwe ũngĩatuĩkire mũthamaki. Jehova aacokire akĩmwĩra ũũ: ‘Niĩ ndoraga ũrĩa mũndũ ahaana ngoro thĩinĩ, no ti ũrĩa aroneka na nja.’

Jesii nĩ aatwarire ariũ acio angĩ ake atandatũ kũrĩ Samueli. No Samueli akĩmwĩra ũũ: ‘Hatirĩ o na ũmwe harĩ aya ũthuurĩtwo nĩ Jehova. Ici nĩcio ciana ciaku ciothe?’ Nake Jesii akiuga: ‘Nĩ harĩ ũngĩ ũmwe wa kĩhinga nda, na etagwo Daudi. Nĩ kũrĩithia ararĩithia.’ Rĩrĩa Daudi okire, Jehova eerire Samueli ũũ: ‘Ũcio nĩ we!’ Samueli nĩ aitĩrĩirie Daudi maguta mũtwe nĩguo atuĩke Mũthamaki wa Isiraeli thutha wa Saulu.

Thutha ũcio, Aisiraeli nĩ maathiire kũrũa na Afilisiti, arĩa maakoragwo na njamba ĩmwe ya ita yetagwo Goliathu. Goliathu nĩ aanyũrũragia Aisiraeli o mũthenya. Oigaga ũũ aanĩrĩire: ‘Ndũmĩrai mũndũ ũmwe oke tũrũe nake. Aahoota tũgũtuĩka ngombo cianyu, no ndamũhoota mũgũtuĩka ngombo citũ.’

Daudi nĩ aathiire kambĩ-inĩ ya Aisiraeli gũtwarĩra ariũ a nyina irio tondũ maarĩ thigari. Nĩ aaiguire ũrĩa Goliathu oigaga, nake akiuga: ‘Niĩ nĩ ngũthiĩ kũrũa nake!’ No Mũthamaki Saulu akĩmwĩra: ‘We ũrĩ o mũndũ mũnini.’ Nake Daudi akiuga: ‘Jehova nĩ ekũndeithia.’

 Saulu nĩ aaheire Daudi indo ciake cia mbaara, no Daudi akĩmwĩra: ‘Ndingĩhota kũrũa na indo ici.’ Daudi aacokire akĩoya kĩgũtha gĩake na agĩthiĩ handũ karũũĩ-inĩ. Aathurire tũhiga tũtano tũnyoroku na agĩtũikia kondo-inĩ. Daudi aacokire agĩteng’era kũrĩ Goliathu. Goliathu aanĩrĩire akĩmwĩra ũũ: ‘Ũka haha kahĩĩ gaka. Ngũgũikĩria nyoni cia rĩera-inĩ na nyamũ cia gĩthaka.’ No Daudi ndeetigĩrire. Aamwĩrire ũũ: ‘Wee ũroka harĩ niĩ na rũhiũ rwa njora na itimũ, no niĩ ndĩroka harĩ wee na rĩĩtwa rĩa Jehova. Mũtirarũa na ithuĩ, mũrarũa na Ngai. Gũtirĩ mũndũ ũrĩ haha ũtekuona atĩ Jehova arĩ hinya gũkĩra rũhiũ rwa njora na itimũ. Ekũmũneana moko-inĩ maitũ inyuothe.’

Daudi nĩ eekĩrire kahiga kĩgũtha-inĩ, na agĩkĩhiũria na hinya wake wothe. Nĩ ũndũ wa ũteithio wa Jehova, kahiga kau kaaringire Goliathu thithi-inĩ na gagĩtonyerera. Goliathu no kũgũa aagũire na agĩkua. Afilisiti mona ũguo no kũũra moorire. Hihi wee nĩ wĩhokete Jehova ta ũrĩa Daudi eekire?