Jiova bin tɛl Samiɛl se: ‘Go na Jɛsi in os. Wan pan in bɔypikin dɛn go bi di nɛks kiŋ na Izrɛl.’ So Samiɛl go na Jɛsi in os. We i bin si Jɛsi in fɔs bɔypikin, i tink se: ‘Na dis yɔŋman Jiova dɔn pik.’ Bɔt Jiova tɛl Samiɛl se nɔto dis yɔŋman i pik. Dɔn Jiova tɔk se: ‘A nɔ jɔs de si aw pɔsin luk lɛk, bɔt a de si wetin de insay pɔsin in at.’

Jɛsi kam wit siks mɔ pan in bɔypikin dɛn. Bɔt Samiɛl se: ‘Jiova nɔ pik ɛniwan pan dɛn. Yu gɛt ɔda bɔypikin dɛn?’ Jɛsi tɔk se: ‘A gɛt wan pikin bak we na mi las bɔypikin, in nem Devid. I de na fil de kia fɔ mi ship dɛn.’ We Devid kam, Jiova tɛl Samiɛl se: ‘Na in a dɔn pik!’ Samiɛl anɔynt Devid fɔ bi di nɛks kiŋ bay we i tɔn ɔyl na in ed.

Afta sɔm tɛm, di Izrɛlayt dɛn bin de fɛt wit di Filistin dɛn we bin gɛt wan jayant we de fɛt fɔ dɛn, we in nem na Golaya. Ɛvride, Golaya bin de provok di Izrɛlayt dɛn. I bin de ala se: ‘Una sɛn wan man fɔ kam fɛt mi. If na in win, wi go bi una slev dɛn. Bɔt if na mi win, una go bi wi slev dɛn.’

Devid kam na di Izrɛlayt sojaman dɛn kamp fɔ briŋ it fɔ in brɔda dɛn we na sojaman dɛn. I yɛri wetin Golaya bin tɔk ɛn i se: ‘A go fɛt am!’ Kiŋ Sɔl tɔk se: ‘Bɔt yu na smɔl bɔbɔ.’ Devid ansa am se: ‘Jiova go ɛp mi.’

 Sɔl bin tray fɔ mek Devid yuz in tin dɛn fɔ fɛt, bɔt Devid tɛl am se: ‘A nɔ go ebul fɔ yuz dɛn tin ya fɔ fɛt.’ Devid bin tek in sling ɛn go na watasay. I pik fayv ston dɛn ɛn put am insay in bag. Dɔn Devid rɔn go mit Golaya. Di jayant ala se: ‘Yu smɔl bɔbɔ, kam na ya. A go mek di bɔd dɛn we de flay ɛn dɛn wayl animal dɛn it yu bɔdi.’ Devid nɔ bin de fred. Insɛf ala se: ‘Yu kam wit sɔd ɛn spia, bɔt mi de kam wit Jiova in nem. Nɔto wi yu de fɛt, bɔt na Gɔd yu de fɛt. Ɔlman na ya go si se Jiova pawaful pas sɔd ɔ spia. I go mek wi win una.’

Devid put wan ston na in sling ɛn sɛn am wit ɔl in trɛnk. Wit Jiova in ɛp, di ston go rayt insay Golaya in ed. Di jayant fɔdɔm na grɔn. Dɔn di Filistin dɛn rɔnawe fɔ dɛn layf. Yu go abop pan Jiova jɔs lɛk Devid?