တၢ်မၤလိ ၄၀
စီၤဒၤဝံးဒီး စီၤကၤလယး
ယဟိဝၤယွၤတဲဘၣ် စီၤၡမူၤအ့လးလၢ– ‘လဲၤလၢစီၤယံးၡဲအဟံၣ်, ဒီးလၢအဖိခွါတဖၣ်အကျါတဂၤန့ၣ် ကကဲထီၣ်ပှၤအံၣ်စရ့လးဖိ အစီၤပၤလၢခံတဂၤလီၤ.’ လၢတၢ်န့ၣ်အဃိ စီၤၡမူၤအ့လးလဲၤဝဲဆူ စီၤယံးၡဲအဟံၣ်လီၤ. ဖဲစီၤၡမူၤအ့လးထံၣ်ဘၣ်ဝဲ စီၤယံးၡဲအဖိခွါ အဒိၣ်ကတၢၢ်တဂၤအခါ အဝဲဆိကမိၣ်ဝဲလၢ– ‘ပှၤသးစၢ်တဂၤအံၤ ကဘၣ်မ့ၢ်ပှၤတဂၤလၢ ယဟိဝၤယွၤဃုထၢထီၣ်ဝဲန့ၣ်လီၤ.’ ဘၣ်ဆၣ် ယဟိဝၤယွၤတဲဘၣ် စီၤၡမူၤအ့လးလၢ တမ့ၢ်ပှၤတဂၤအံၤဘၣ်. ယဟိဝၤယွၤတဲဝဲလၢ– ‘ယတကွၢ်ထဲ ပှၤအက့ၢ်အဂီၤဘၣ်, ယကွၢ်တၢ်အိၣ်လၢပှၤသးပူၤလီၤ.’
စီၤယံးၡဲဒုးနဲၣ်စီၤၡမူၤအ့လးလၢ အဖိခွါဃုဂၤလံ. ဘၣ်ဆၣ် စီၤၡမူၤအ့လးတဲဝဲလၢ– ‘ယဟိဝၤယွၤတဃုထၢထီၣ် အဝဲသ့ၣ်နီတဂၤဘၣ်. မ့ၢ်နဖိခွါအိၣ်ဒံးတဂၤဂၤဧါ.’ စီၤယံးၡဲတဲဘၣ်စီၤၡမူၤအ့လးလၢ– ‘ယဖိခွါအိၣ်ဒံးတဂၤ, အဝဲမ့ၢ်ယဖိခွါသဒါ ဒီးအမံၤမ့ၢ်စီၤဒၤဝံးလီၤ. ခဲအံၤ အဝဲလဲၤကွၢ်ယသိလၢ တၢ်ပျီပူၤလီၤ.’ ဖဲစီၤဒၤဝံးဟဲက့ၤအခါ ယဟိဝၤယွၤတဲဘၣ် စီၤၡမူၤအ့လးလၢ– ‘ယဃုထၢထီၣ်ပှၤတဂၤအံၤလီၤ.’ စီၤၡမူၤအ့လးလူလီၤသိလၢ စီၤဒၤဝံးအခိၣ်လိၤ ဒ်သိးအဝဲကကဲထီၣ် ပှၤအံၣ်စရ့လးဖိ အစီၤပၤလၢခါဆူညါအဂီၢ်လီၤ.
တယံာ်တမီၢ်န့ၣ် ပှၤအံၣ်စရ့လးဖိ ဒုးလိာ်အသးဒီးပှၤဖလ့ၡသးဖိတဖၣ်လီၤ. ဒီးပှၤဖလ့ၡသးဖိ လၢအနီၢ်ဒိၣ်အိၣ်ဝဲတဂၤလၢ အမံၤမ့ၢ်စီၤကၤလယးလီၤ. တနံၤဘၣ်တနံၤန့ၣ် စီၤကၤလယးတဲဆါဝဲ ပှၤအံၣ်စရ့လးဖိလီၤ. စီၤကၤလယးကိးပသူထီၣ်လၢ– ‘ဆှၢထီၣ် နပှၤသုးဖိတဂၤလၢ ကဒုးတၢ်ဒီးယၤသၢၣ်. အဝဲမၤယၤမ့ၢ်နၢၤန့ၣ် ပကကဲထီၣ်သုကုၢ်, ဘၣ်ဆၣ် ယမၤမ့ၢ်နၢၤန့ၣ် သုကဘၣ်ကဲထီၣ် ပကုၢ်လီၤ.’
စီၤဒၤဝံးအဝဲၢ်တဖၣ် ကဲသုးလီၤ. လၢတၢ်န့ၣ်အဃိ စီၤဒၤဝံးလဲၤဝဲဆူ ပှၤအံၣ်စရ့လးဖိအသုးဖိတဖၣ် အိၣ်တၢ်လီၢ် ဒ်သိးကလဲၤစိာ်န့ၢ်အဝဲၢ်တဖၣ် တၢ်အီၣ်တၢ်အီန့ၣ်လီၤ. ဖဲစီၤဒၤဝံးနၢ်ဟူ စီၤကၤလယးအတၢ်ကတိၤအခါ အဝဲတဲဝဲလၢ– ‘ယကဒုးတၢ်ဒီးအီၤလီၤ.’ စီၤပၤစီၤစီလူးတဲဘၣ်စီၤဒၤဝံးလၢ– ‘နမ့ၢ်ဖိသၣ်လီၤ.’ ဘၣ်ဆၣ် စီၤဒၤဝံးတဲဆၢက့ၤအီၤလၢ– ‘ယဟိဝၤယွၤ ကမၤစၢၤယၤလီၤ.’
စီၤစီလူးမၢ စီၤဒၤဝံးသိးထီၣ်ကွၢ် အဆ့ကၤဒီးအစုကဝဲၤတဖၣ် ဘၣ်ဆၣ် စီၤဒၤဝံးတဲဝဲလၢ– ‘ယမ့ၢ်လဲၤဒ်အံၤန့ၣ် ယဒုးတၢ်တဘၣ်လၢၤဘၣ်.’ စီၤဒၤဝံးဟံးန့ၢ်ပျံၤလၢ ကကွံာ်လၢၢ်အဂီၢ် ဒီး လဲၤလီၤဝဲဆူထံကျိအကပၤလီၤ. စီၤဒၤဝံးဃုထၢထီၣ်လၢၢ်ယဲၢ်ဖျၢၣ် ဒီးဖၢနုာ်လီၤဝဲလၢအထၢၣ်ပူၤလီၤ. ဝံၤဒီးစီၤဒၤဝံးလဲၤဃ့ၢ်ဝဲဆူ စီၤကၤလယးအအိၣ်လီၤ. စီၤကၤလယးကိးပသူထီၣ်ဝဲလၢ– ‘နနီၢ်ဆံးဆံးန့ၣ် ဟဲလၢအံၤတထံၣ်. နဖံးနညၣ်န့ၣ် ယကဒုးအီၣ်ကွံာ် ထိၣ်ဖိလံၣ်ဖိဒီးဆၣ်ဖိကီၢ်ဖိအမံၤတဖၣ်လီၤ.’ ဘၣ်ဆၣ် စီၤဒၤဝံးတပျံၤအီၤဘၣ်. စီၤဒၤဝံးတဲဆၢအီၤလၢ– ‘နဟဲဒီးနးဧိၤဘီဧိၤ ဘၣ်ဆၣ် ယဟဲလၢယဟိဝၤယွၤအမံၤလီၤ. နတဒုးတၢ်ဒီးပှၤဘၣ်. မ့ၢ်နဒုးတၢ်ဒီးကစၢ်ယွၤလီၤ. ကယဲၢ်ပှၤအိၣ်ဖဲအံၤတဖၣ် ကသ့ၣ်ညါဝဲလၢ ယဟိဝၤယွၤန့ၣ် အစိကမီၤဒိၣ်န့ၢ်ဒံးနးဧိၤဘီဧိၤလီၤ. ယဟိဝၤယွၤ ကဟ့ၣ်လီၤနၤလၢယစုပူၤလီၤ.’
စီၤဒၤဝံးပာ်လီၤလၢၢ်လၢပျံၤလိၤ, တဝံၢ်ထီၣ်ဝဲဆူၣ်ဆူၣ်ဒီး ကွံာ်ဝဲလီၤ. ခီဖျိလၢ ယဟိဝၤယွၤ အတၢ်မၤစၢၤအဃိလၢၢ်အံၤ လဲၤဘၣ်ဝဲစီၤကၤလယးအခိၣ်တိသၣ်လီၤ. ဒီးစီၤကၤလယးလီၤဃံၢ်သံဝဲ လၢဟီၣ်ခိၣ်လိၤလီၤ. ဝံၤဒီး ပှၤဖလ့ၡသးဖိတဖၣ် ဃ့ၢ်ကွံာ်ဝဲလီၤ. မ့ၢ်နနာ်န့ၢ်ယဟိဝၤယွၤ ဒ်စီၤဒၤဝံးအသိးဧါ.
“တသ့ဘၣ်ဒီး ပှၤကညီ ဘၣ်ဆၣ်ဒီး, တသ့ဘၣ်ဒီးယွၤန့ၣ်တမ့ၢ်ဘၣ်. အဂ့ၢ်ဒ်အံၤ, ယွၤသ့တၢ်လၢာ်လီၤ.”—မၢ်ကူး ၁၀:၂၇
တၢ်ဂ့ၤအဂၤလၢ နကဘၣ်သး
သိၣ်လိနဖိတဖၣ် တက့ၢ်
စီၤဒၤဝံး တပျံၤတၢ်ဘၣ်
ဖးကွၢ် လံာ်စီဆှံပူဖိလၢ အလီၤသူၣ်ဟူးသးဂဲၤအံၤဒီး နကသ့ၣ်ညါ ဘၣ်မနုၤအဃိ စီၤဒၤဝံးအိၣ်ဒီး တၢ်သူၣ်ဒူသးဒူအဂ့ၢ်န့ၣ်လီၤ.
