Yave wavovesa Samuele vo: ‘Wenda kuna nzo a Yisai. Mosi muna wan’andi okala se ntinu ampa muna Isaele.’ Muna kuma kiaki, Samuele wayenda kuna nzo a Yisai. Vava kamona omwan’a wambuta, wayindula vo: ‘Nanga toko diadi i yandi kikilu.’ Kansi Yave wavovesa Samuele vo ke yandi ko kasolele. Yave wavova vo: ‘Omono ntim’a muntu italanga, ke ndose ko.’

Yisai watwasa wana sambanu ankaka vana vakala Samuele. Kansi Samuele wavova vo: ‘Yave kasolele mosi ko muna yau. Kuna ye wana ankaka ko?’ Yisai wavutula vo: ‘Mosi kaka osidi, ona wa nsuka. Nkumbu andi Davidi. Mameme mame kele vungula.’ Vava Davidi kayiza, Yave wavovesa Samuele vo: ‘Yandi ndioyo nsolele!’ Samuele wakusa mazi vana ntu a Davidi, wantumbika se ntinu a Isaele.

Kuna kwalanda, Aneyisaele bayenda nwana vita ye Afelesetia, ana bakala ye nkwa ngolo wayikilwanga vo Ngoleyate. E lumbu yawonso, Ngoleyate wasakanenanga Aneyisaele. Wavova vo: ‘Nusola muntu ona onwana yame. Avo unsundidi, tukituka abundu eno. Kansi avo insudidi, oyeno nukituka abundu eto.’

Davidi wayenda fila madia kwa mpangi zandi, ana bakala muna buka kia makesa ma Isaele. Vava kawá e mvovo mia Ngoleyate, wavova vo: ‘Mono inuana yandi.’  Saulu wa ntinu wamvovesa vo: ‘Ongeye wakinu nleke.’ Davidi wavova vo: ‘Yave okunsadisa.’

Saulu wazola vo Davidi kanata nsosolo andi, kansi Davidi wavova vo: ‘Kisadila nsosolo wau ko.’ Davidi wabonga nsing’andi wa tubila matadi yo kwenda kuna nkoko. Wasola matadi tanu mavindumuka yo sia mo muna nkutu. I bosi, Davidi wayenda vana vakala Ngoleyate. Ngoleyata wamvovesa vo: ‘E mwana, wiza kwa mono. Ivana e nitu aku kwa nuni za zulu ye bulu ya mfuta.’ O Davidi kamona wonga ko. Wavova vo: ‘Ongeye wizidi ye nsosolo ye dionga, kansi omono ngizidi muna nkumbu a Yave. Ke yeto ko onwanisanga, kansi Nzambi. Awonso bena ovava bezaya wo vo nkum’a Yave usundidi o nsosolo ye dionga. Okuyekola vana moko meto.’

Davidi wakanga e tadi muna nsing’andi yo tuba dio muna ngolo zawonso. Muna lusadisu lwa Yave, e tadi diawandama vana lose lwa Ngoleyate. O nkwa ngolo ndioyo wabwa vana ntoto yo fwa. Vava Afelesetia bamona wo, batina mu tanina mioyo miau. Nga obundanga e vuvu muna Yave nze una Davidi kavanga?