Jehova ali ku Samuele: ‘Zamaya kwa ndu ya Jese. Yomuñwi wa bana bahae babashimani ukaba mulena yatatama wa Isilaele.’ Kacwalo, Samuele aya kwa ndu ya Jese. Hanaaboni mwana wamushimani yomuhulu ka kufitisisa wa Jese, aipulelisa ali: Mucaha yo uswanela kuba yena.’ Kono Jehova ataluseza Samuele kuli yo nesi yena yanaaketilwe. Jehova kihaa li: ‘Nibona zeinzi mwa pilu ya mutu isiñi ponahalo ya kwande.’

Jese atisa bana bahae ba 6 ku Samuele. Kono Samuele ali ku yena: ‘Hakuna wa ku bona yaketilwe ki Jehova. Kana unani bana babashimani babañwi hape?’ Jese ali: ‘Kunani yomuñwi yasiyezi, mwanaaka yomunyinyani ka kufitisisa, ili Davida. Uile kuyo lisa lingu.’ Davida hanaakutile, Jehova abulelela Samuele kuli: ‘Ki yena yeniketile yo!’ Samuele asela oli fa toho ya Davida, mi amutoza kuba mulena yanaaka busa Isilaele.

Hamulaho wa nako, Maisilaele balwana ni Mafilisita, ili bane banani singangalume sesibizwa Goliati, sene sisweli kubalwanela. Zazi ni zazi, Goliati naasheununanga Maisilaele. Ahuwa ali: ‘Hamukete muuna yakato lwana ni na. Haiba anitula lukaba batanga bamina. Kono haiba nimutula, mukaba batanga baluna.’

Davida ataha kwa mafulo a mpi ya Maisilaele inze alwezi lico za bahulwani bahae bane bali masole. Autwa zanaabulela Goliati, mi ali: ‘Nikayo lwana ni yena!’ Mulena Saule  kihaa li: ‘Kono u mutangana feela.’ Davida aalaba kuli: ‘Jehova uka nitusa.’

Saule afa Davida liapalo zahae za ndwa kuli aitusise zona, kono Davida ali ku yena: ‘Hanikoni kulwana inze nitinile liapalo ze.’ Davida aanga kafwililo kahae ni kuya kwa kanukana. Mi aketa macwe aketalizoho amande ni kuabeya mwa mukotana wahae. Cwale Davida amata inze alibile ku Goliati. Singangalume seo sahuwa kuli: ‘Taha kwanu, mutangana. Nikafa nama yahao kwa linyunywani za lihalimu ni libatana za mwa naheñi.’ Davida naasika saba. Davida aalaba Goliati kuli: ‘Utaha ku na ulwezi mukwale ni lilumo, kono na nitaha ku wena ka libizo la Jehova. Haulwanisi luna; kono ulwanisa Mulimu. Batu kaufela babainzi fa bakaziba kuli Jehova unani maata kufita mukwale kamba lilumo. Kaufelaa mina uka mifa mwa mazoho aluna.’

Davida abeya licwe mwa kafwililo kahae mi akapotolohisa ka taata. Ka tuso ya Jehova, anepa licwe mi layo likelela mwa pata ya Goliati. Singangalume sawela fafasi mi sashwa. Mafilisita babaleha kuli bapilise bupilo bwabona. Kana musepile Jehova sina Davida mwanaa musepezi?