Chieng’ moro Jehova nonyiso Samuel kama: ‘Dhi e od Jesse. Achiel kuom yawuote e ma biro bedo ruodh Israel bang’ Saulo.’ Samuel ne odhi e od Jesse. Ka ne Samuel oneno wuod Jesse makayo, ne oparo ni: ‘Nyaka bed ni ma e wuoyi ma Jehova oyiero.’ To Jehova nonyiso Samuel ni wuoyino ok e ma noyiero. Jehova nonyise niya: ‘An ang’iyo gima ni e chuny ng’ato, to ok kaka dende kata wang’e chalo.’

Jesse nokelo yawuote mamoko auchiel e nyim Samuel. To Samuel ne owachone ni: ‘Jehova ok oyiero moro amora kuomgi. Dibed ni nitie ma pod onge?’ Jesse nowacho ni: ‘Nitie achiel modong’. En e chogo, to nyinge Daudi. Sani okwayo rombe.’ Ka ne oluong Daudi, Jehova ne onyiso Samuel ni: ‘Ma e wuoyi ma ayiero.’ Samuel ne oolo mo e wi Daudi kowale mondo obi obed ruodh Israel.

Bang’ kinde moko, Jo-Israel ne odhi kedo gi Jo-Filistia. Jo-Filistia ne nigi jalweny moro ma rabet. Ne osiko kojaro Jo-Israel pile. Nokok kama: ‘Miyauru ng’ato akedgo. Koloya, wabiro bedo wasumbniu. To ka aloye, ubiro bedo wasumbniwa.’

Chieng’ moro, Daudi ne otero chiemo ne owetene ma ne ni e lwenyno. Nowinjo ka Goliath dhianjo wach, mi owacho kama: ‘Abiro kedo gi Goliath!’ Ruoth Saulo nokwere ni: ‘In rawera matin ma kik iketri ni idwa kedo gi rabetno.’ To Daudi nodwoke ni: ‘Jehova biro konya loye.’

 Saulo nokawo gigene mag lweny momiyo Daudi mondo orwaki, to Daudi nonyise ni: ‘Gigi ohewa.’ Daudi nokawo orujrene, kae to nodhi e dho aora. Noyiero kite matindo abich mapoth, kendo noketogi e bagne. Kae to noringo kochomo ir Goliath. Goliath nonyise ni: ‘Temie chopo kae, ka donge dami winy gi le dendi mondo ocham.’ Daudi ne ok oluor. Nokok ne rabetno niya: ‘In ibirona gi ligangla kod tong’, to an abironi gi nying Jehova. Iparo ni wan e ma ikedo kodwa, to kare ikedo gi Nyasaye. Ji duto man kae biro fwenyo ni kare Jehova nigi teko mohingo ligangla kod tong’. Jehova biro chiwou uduto e lwetwa.’

Daudi noketo kidi e orujre, kendo norundo orujreno matek ahinya. Nikech Jehova ne ni kod Daudi, ka ne odiro kidino, kidino nodhi modonjo e pat wi Goliath. Rabetno noredhore piny, mi otho tikli. Ka ne Jo-Filistia oneno mano, ne giringo matek ka gitemo reso ngimagi. Be igeno kuom Jehova kaka Daudi notimo?