Jyobaa duˈun tˈanmääyë Samuel: “Nëjkx mä Jesé tyëjk. Yëˈë niduˈugë myäänk diˈib tunäämp rey jam Israel”. Päätyë Samuel ojts nyijkxy ets ko tˈijxy ja kaˈaxkopkpë, ta wyinmääy: “Seguurë ko yëˈë tyäˈädë mixy diˈib të yajwinˈixy”. Perë Jyobaa ta tˈanmääyë Samuel ko kyaj yëˈëty ets ta ttukmëtmaytyaky: “Ëjts, yëˈëts nˈijxypy wiˈix tuˈugë jäˈäy yˈixëtyë jyot kyorasoon, kyaj yëˈëty wiˈix yˈixëty nikëjxy këbajky”.

Jesé, ta ttukwinguwoˈowë Samuel ja nidëdujkë yˈuˈunk. Perë Samuel ta jyënany: “Nituˈugë Jyobaa të tkawinˈixy. ¿Jaa wiinkpë mˈuˈunk?”. Jesé ta yˈatsooy: “Taa jatuˈugë mutskpë, txëwˈaty David, jeˈeyë ko tam byorreegë kuentˈaty”. Ko David jyajty, ta Jyobaa tˈanmääyë Samuel: “¡Yëˈë duˈunë tyäˈädë!”. Ta netë Samuel ttukutaamëˈkyë aseytë ja David. Duˈunën yajwinˈijxy parë tyunët rey jam Israel.

Ko tiempë nyajxy, ta ja israelitëty tsyiptuundë mët ja filisteety, ets myëdäjttëbë nety tuˈugë tsyiptuumbë diˈib jantsy yeny tënaapy, txëwˈäjty Goliat. Bom bom ijtyë Goliat tnëxiˈiky ttukxiˈigyë israelitëty ets yaˈaxy jyoky: “Kaxtë tuˈugë yetyëjk diˈibëts mëët ntsiptunët. Pën xymyëmadakpëts, tats xytyuumbëˈattët, per pën ëjts madakp, tats miitsëty nduumbëˈattët”.

Ja myëgaˈaxëtyë David soldäädë nety tyundë, pääty ojts tmënëjkxë kyaˈay yˈukën mä nety jam tsyiptundë. Jam tmëdooy wiˈixë  Goliat yaˈaxy jyoky. David ta jyënany: “¡Ëjts mëët ntsiptunäˈäny!”. Ta ja rey Saúl yˈatsoowë: “Per mijts mutsknëm”. David ta yˈatsooy: “Jyobaa yëˈëts xypyudëkëyäämp”.

Ta ja Saúl tyukˈanuˈkxë ja wyit diˈib mëët tsyiptuny, perë David ta jyënany: “Kyajts mbäät ntsiptuny mëdë tyäˈädë wit”. Ta David twijtsëˈky ja tyiˈpxn. Ta net ojts nyijkxy nëˈagëˈëy ets jap twinˈijxy mëgoxkë tëˈkx tsää, ta tˈabiˈiwë byolsoty. Ta pëyeˈegyë ojts tninëjkxyë Goliat. Ta ja Goliat yaxkeky: “¡Okmin mixyuˈunk, tyää xyˈokˈixët! Yëˈë mniniˈkx mgëbäjk yëˈëts ndukwintsuˈutsaambyë joon etsë jëyujk animalë awäˈänatypyë”. David, ta amëk jotmëk tˈatsooy: “Mijts xynyiminy mët tuˈugë mˈespäädë etsë mlansë, per ninëjkxy xyëëwgyëjxmë Jyobaa. Kyaj mtsiptuny mët ëëtsëty, yëˈë mëët mtsiptunyë Dios. Niˈamukë tyam tˈixäˈändë ko Jyobaa yëˈë diˈib mas kumëjääw ets kyaj dyuˈunëty tuˈugë espäädë o lansë. Jyobaa yëˈë diˈib miitsëty mgëyakanëdëp”.

Ta netë David tpëjtaky ja tsää mä ja tyiˈpxn ets ta amëjääw tˈajëduuy. Yëˈë Jyobaa pudëjkë parë ja tsää amëjääw ojts nyijkxy ets ta tyëjkë mä wyimbokë Goliat. Ta ja Goliat kyëdääy ets yˈoˈky. Ta ja filisteety kyaktë parë kyaj yˈooktët. Ets mijts, ¿nan mmëbëjkypyë Jyobaa extëmë David?