A Zeova yeela a Sãmwɛll yaa: ‘Kẽng a Zese zakẽ wã, tɩ m yãka a bi-ribl a ye t’a na n wa lebg Israyɛll rĩma.’ A Sãmwɛll sɩd kẽngame. A sẽn yã a Zese bi-kãsengã, a tagsame tɩ yẽ la a Zeova yãk-yã. La a Zeova yeelame tɩ pa yẽ ye. A paasame: ‘Da ges a ra-sãndã ne a woglmã ye. Ka rẽ la mam get ye. Mam geta sẽn be sũurẽ.’

A Zese boola a kom-dibli a yoob tɩ b wa, la a Sãmwɛll yeelame: ‘A Zeova pa yãk b ned baa a ye. Fo tara kom-dibli a taab bɩ?’ T’a Zese leok yaa: ‘A yembr n kete. Yẽ la b fãa yao. A yʋʋr la a Davɩɩde. A gũuda piisi.’ A Davɩɩd sẽn wa wã, a Zeova yeela a Sãmwɛll yaa: ‘Yãoã la mam yãk-yã.’ A Sãmwɛll ninga a Davɩɩd zugã kaam, t’a na n wa lebg Israyɛll rĩma.

Kaoosg zugẽ, Filisti nebã wa n yika zabr ne Israyɛll nebã. Filisti nebã ra tara sodaag sẽn yaa wok la bedre, t’a yʋʋr la a Goliate. A ra yaanda Israyɛll nebã daar fãa. A ra kelemdame n yetẽ: ‘Yãk-y ned a ye t’a wa zab ne maam. A sã n tõog maam, tõnd na n lebga yãmb yembse. La mam sã n tõog-a, yãmb na n yɩɩ tõnd yembse.’

A Davɩɩd wa n waa Israyɛll sodaasã sẽn beẽ wã, n na n kõ a kẽem-dãmbã sẽn yaa sodaasã rɩɩbo. A wʋma a Goliat goamã, n yeel yaa: ‘Mam na n tɩ zaba ne-a.’ Rĩm a  Sayull yeel-a lame yaa: ‘Fo nan yaa biiga.’ La a Davɩɩd leokame: ‘A Zeova na n sõnga maam.’

A Sayull kõo a Davɩɩd a zab-teedã, la a Davɩɩd yeelame: ‘Mam pa tõe n bob n kẽn ye.’ A Davɩɩd rɩka a loaabgã, n kẽng koomã noor n tɩ wʋk kug-saal a nu n sui a korgẽ wã. A wudgame n na n tɩ sɛg a Goliate, t’a Goliat kelem n yeel yaa: ‘Fo we n wa. Mam na n kʋʋ foo, tɩ liuuli wã ne we-rũmsã wãbe.’ A Davɩɩd pa yɛɛs ye. A yeelame: ‘Fo zãada sʋʋg ne kãnd n watẽ. La mam wata ne a Zeova yʋʋre. Ka ne tõnd la fo zabd ye. Yaa ne Wẽnnaam. Neb nins sẽn be ka wã na n bãngame t’a Zeova tara pãng n yɩɩd sʋʋg bɩ kãnde. A na n sõnga tõnd tɩ d tõog yãmb fãa.’

A Davɩɩd yãka kugr n ning a loaabgẽ wã n yilim ne a pãngã fãa n lobge. A Zeova kɩtame tɩ kugrã tɩ wẽ a Goliat rĩirã, n fõr n kẽ, t’a lʋɩ n ki. Filisti nebã zoeeme. Fo me teega a Zeova wa a Davɩɩd bɩ?