Jehová kiiljuik Samuel: “Xia Isaí [ o Jesé] ichaj, pampa nijtlapejpenijtok se ikone ma tlanauati ipan Israel”. Samuel yajki, uan kema kiitak Isaí iachtouikone, moiljuik: “Uelis Jehová kitlapejpenijtok ni telpokatl”. Uajka Jehová kiiljuik Samuel amo kitlapejpenijtoya nopa telpokatl. Nojkia kiiljuik: “Na amo nikinita maseualmej san kej nesij, na nikita nochi tlen kipiaj ipan ininyolo”.

Isaí kinualikak sekinok chikuasej ikoneuaj kampa Samuel itstoya. Uajka Samuel kiiljuik: “Jehová amo kintlapejpenijtok inijuantij. ¿Tikinpia sekinok mokoneuaj?”. Isaí kinankilik: “San poliui katli teipaejketl, itoka David, yajtok kinmokuitlauia borregojmej”. Kema David asito, Jehová kiiljuik Samuel: “Ya ni katli nijtlapejpenijtok”. Uajka Samuel kitekilik aceite ipan itsonteko. Kiampa kinextik David tlanauatiskia ipan Israel.

Teipa, filisteaeuanij kinteuiyayaj israeleuanij. Inijuantij kipixtoyaj se tlateuijketl tlauel uejkapantik, motokaxtiyaya Goliat. Uan Goliat mojmostla kintlaijiljuiyaya uan kinpinajtiyaya israeleuanij, chikauak kiniljuiyaya: “Xijtlapejpenikaj se tlakatl katli iuaya nimoteuis. Tlaj nechtlanis, tojuantij tiinmechtekipanosej. Uan tlaj na nijtlanis, inmojuantij intechtekipanosej”.

David iikniuaj nojkia tlateuiyayaj, yeka kema David kinuikilik tlakualistli, kintemoto kampa itstoyaj tlateuianij. Nopaya kikajki tlen Goliat chikauak kiijtouayaya, yeka kiijtok: “¡Na nimoteuiti iuaya!”. Tlanauatijketl Saúl kiiljuik: “Ta nojua titelpokatl”. David kinankilik: “Jehová nechpaleuis”.

 Uajka, Saúl kimakak David nopa tepostli tlen ika ya tlateuiyaya, uan David kiiljuik: “Amo uelis nitlateuis ika ni tepostli”. Yeka David san kikuitejki iteuitlats. Ika se teuitlatstli kimajkauaj tetl. Teipa David yajki ipan se atlajtli, kitlapejpenik makuili tetl tlen ajalaxtik uan kikalakik imorralko, uan yajki kampa itstoya Goliat. Nopa uejkapantik tlakatl chikauak kiiljuik: “¡Ximonechkaui piltelpokatsi, uan tikitas tlen mitspanos! Nikinmakas ma kikuakaj motlakayo totomej uan tlapialmej tlen itstokej kuatitla”. David amo majmauiyaya uan kinankilik: “Ta tiuala tinechteuiki ika moespada uan ika se kuatlamintli, uan na nimitsteuis ika Jehová itetikayo. Amo tojuantij titechteuia, tijteuia toTeotsij. Nochi katli nikaj itstokej kiitasej Jehová kipia miak chikaualistli, uan amo se espada o se kuatlamintli. Uan yaya inmechtemaktilis tomako”.

Teipa David kitlalik se tetl ipan iteuitlats uan chikauak kimajkauilik Goliat. Jehová kipaleuik, yeka ika nopa tetl kikuakoyonik Goliat. Kiampa mijki nopa uejkapantik tlakatl. Uajka filisteaeuanij cholojtejkej pampa amo kinekiyayaj ma kinmiktikaj. ¿Nojkia timotemachia ipan Jehová kej David kichijki?