Jiova kiluij Samuel: “Xiyouj ichan Jesé. Semej ikoneuan yeski ojpatika tekiuaj itech xolal Israel”. Yejua ika Samuel yajki, uan keman kiitak akin tayekanaya, kinemilij: “Yejua nejin telpoch kiixpejpenak”. Sayoj ke Jiova kiluij Samuel ke amo yejua katka, uan no kiluij: “Nejua nikita keniuj yekmelauj tamatij taltikpakneminij, amo sayoj nikita keniuj moitaj tapani”.

Jesé kiualkuilij Samuel okseki chikuasen ikoneuan. Sayoj ke Samuel kijtoj: “Jiova amo kiixpejpenak nion semej. ¿Tikinpia okachi konemej?”. Jesé kinankilij: “Sayoj poliui xokoyot, David, akin kinyekpixtok ichkamej”. Keman David kalakik, Jiova kiluij Samuel: “¡Yejua nejin!”. Ompa Samuel kikuatekilij aceite David. Ijkon kiixpejpenak maj yeskia ojpatika tekiuaj itech xolal Israel.

Seki tonalmej satepan, israelitas yaya moteuitij iniuan filisteos, akin iniuan moajsia se tateuijkej tel uejkapantik, akin motokaytiaya Goliat. Mojmostaj, Goliat kinkejkelouaya israelitas uan kintsajtsiliaya: “Xiktitanikan se takat maj moteui nouan. Komo nechtani, timochiuaskej nanmotekitikauan. Komo nejua nitatani, namejuan nanmochiuaskej nantotekitikauan”.

David yajki kampa tateuianij israelitas kitalijkaj inintakenkaluan kinkauilito takual iikniuan akin katkaj tateuianij. Ompa kikakik tein Goliat tsajtsia uan kijtoj: “¡Nejua nimoteuis iuan!”. Tekiuaj Saúl kinankilij:  “Sayoj ke semi tiokichpilok”. David kiluij: “Jiova nechpaleuis”.

Ompa, Saúl kitalilij tein yejua ika tateuiaya, sayoj ke David kijtoj: “Amo niuelis nitateuis komo nimotalilia nejin”. Yejua ika David kikuik iateuitats, oso se mekat tein tachijchiuj kemej uelis ika se kitamotas tet. Yajki itech se atauit, kiololoj makuil tet tein ajalaxtik uan kinkalakij itech imorral. Ompa tsikuinik kampa yetoya Goliat. Nejon ueyi takat kijtoj chikauak: “¡Tejua, okichpiltsin, xiuiki uan tikitas! Nikchiuati maj mitskuakan totomej uan koujtajtapialmej”. David amo mouik. Yejua chikauak kinankilij: “Tejua titateuiki ika se espada uan se lanza, sayoj ke nejua nitateuiti itokaykopa Jiova. Amo touan titateuijtok, titateuijtok iuan Dios. Nochin kiitaskej ke Jiova okachi chikauak ke se espada oso se lanza. Yejuatsin namechtemaktiti tomako”.

Ompa, David kitalij se tet itech iateuitats uan kitamotak ika nochi ichikaualis. Ika inepaleuil Jiova, tet motokato iixkuako Goliat. Nejin ueyi takat uetsito miket. Uan filisteos cholojteujkej. ¿Tejua titakuaujtamati iuan Jiova ijkon kemej David?