Jehofa o ile a botša Samuele a re: ‘Eya lapeng la Jese. Ke kgethile yo mongwe wa barwa ba gagwe gore e tle e be kgoši e latelago ya Isiraele.’ Ke moka Samuele a ya lapeng la Jese, gomme ge a bona morwa wa mathomo wa Jese, a ipotša a re: ‘Yo e swanetše go ba e le yena yo Jehofa a mo kgethilego.’ Eupša Jehofa o ile a botša Samuele gore ga se a kgetha morwa yoo wa mathomo gore e be kgoši. Jehofa o ile a re go Samuele: ‘Nna ga ke bone feela seo motho a lego sona ka ntle, eupša ke bona le seo se lego ka pelong ya gagwe.’

Jese o ile a tliša barwa ba gagwe ba bangwe ba tshelelago go Samuele. Eupša Samuele o ile a re: ‘Jehofa ga se a kgetha le ge e le ofe wa bona. Na o sa na le barwa ba bangwe?’ Jese a re: ‘Ee, go sa na le yo mongwe yo monyenyane, eupša ga a gona mo. Leina la gagwe ke Dafida. O sa ile go yo diša dinku tša ka.’ Ge Dafida a boile madišong, Jehofa o ile a botša Samuele a re: ‘Yo ke yena e tlago go ba kgoši ya Isiraele!’ Ke moka Samuele a tlotša Dafida hlogong ka makhura, ka go re’alo a mo kgetha gore e tle e be kgoši ya Isiraele.

Ka morago ga nako e itšego, Baisiraele ba ile ba lwa le Bafilisita, bao ba bego ba na le lešole la go tšhoša leo le bitšwago Goliata. Goliata o be a kwera Baisiraele letšatši le lengwe le le lengwe. O be a ba goeletša a re: ‘Ikgetheleng monna yo a tlago go lwa le nna. Ge a ka mpolaya, re tla ba bahlanka ba lena. Eupša ge nka mmolaya, lena le tla ba bahlanka ba rena.’

Dafida o ile a tlišetša bana ba gabo dijo lefelong leo mašole a Baisiraele a bego a robala go lona. Bana ba gabo Dafida le bona e be e le mašole. Ge Dafida a le moo, o ile a kwa mantšu a Goliata, gomme a re: ‘Nna ke tla lwa le Goliata!’ Kgoši Saulo a re: ‘O ka se kgone go lwa le Goliata, ka gore o sa le yo monyenyane.’ Dafida a re: ‘Jehofa o tla nthuša.’

 Saulo o ile a re Dafida a apare diaparo tša gagwe tša ntwa, eupša Dafida a re: ‘Nka se kgone go lwa ke apere diaparo tše.’ Dafida o ile a tšea seragamabje sa gagwe gomme a ya nokeng. Ge a fihla moo, a kgetha maswikana a mahlano a boreledi gomme a a tsenya ka mokotlaneng. Ke moka a kitimela go Goliata. Monna yoo wa go tšhoša o ile a goeletša Dafida a re: ‘Etla mo mošemane ke wena. Nama ya gago ke tla e nea dinonyana le diphoofolo tša naga.’ Dafida o be a sa tšhabe Goliata. O ile a goeletša Goliata a re: ‘Wena o tla go nna o swere tšhoša le lerumo, eupša nna ke tla go wena ka leina la Jehofa. Tseba gore ga o lwe le rena; eupša o lwa le Modimo. Mašole a ka moka a tla bona gore Jehofa o na le matla go phala tšhoša goba lerumo. Jehofa o tla dira gore re le fenye.’

Ke moka Dafida a tsenya leswikana ka seragamabjeng sa gagwe gomme a le foša ka matla. Jehofa a dira gore leswikana leo le itie Goliata mo hlogong gomme le tsene phatleng ya gagwe. Monna yoo wa go tšhoša o ile a wela fase gomme a hwa. Ke moka Bafilisita ba tšhaba. Na le wena o ithekga ka Jehofa, go swana le Dafida?