Yehova akagambira Samueli ati: ‘Za owa Yese. Omwe aha batabani naija kuba omugabe wa kabiri owa Israeli.’ Samueli akaza owa Yese. Ku yaareebire omutabani omukuru, akateekateeka ati: ‘Buzima ogu niwe.’ Kwonka Yehova akagambira Samueli ngu tiwe. Yehova akamugira ati: ‘Nindeeba omutima gw’omuntu, kitari kyemerero.’

Yese akareetera Samueli abandi abatabani mukaaga. Kwonka Samueli akagira ati: ‘Yehova taine ou atooraine omuri aba. Oine aboojo abandi?’ Yese akamugarukamu ati: ‘Haatsigarayo omwe, omuto, Daudi. Ariisize entaama.’ Daudi ku yaizire, Yehova akagambira Samueli ati: ‘Niwe ogu.’ Samueli akashuka amajuta aha mutwe gwa Daudi, yaahinduka omugabe wa Israeli owa kabiri.

Ku haahingwireho obwire, Abaisraeli bakaba nibaza kurwana n’Abafilistia, abaabaire baine omurwani emanzi orikwetwa Goliasi owaabaire naabarwanirira. Butoosha, Goliasi akaba ajuma Abaisraeli. Akabagira ati: ‘Mwohereze omushaija aije andwanise. Ku araansingure, nitwija kuba abahuuku baanyu. Kwonka ku ndamusingure, nimwija kuba abahuuku baitu.’

Daudi akaba agiire ahu Abaisraeli abarwani baabaire beeteeraniire atwariire bakuru be abaserukare eby’okurya. Akahurira Goliasi kandi yaagira ati: ‘Niinyija kumurwanisa.’ Omugabe Saulo akamugira ati: ‘Kwonka ori muto.’ Daudi akamugarukamu ati: ‘Yehova naija kumpwera.’

 Saulo akateeraho kwenda ngu Daudi akorese eky’okurwanisa kye, kwonka Daudi akamugira ati: ‘Tindikubaasa kurwana njwaire ekijwaro eki.’ Daudi akakwata enjungu ye yaaza aha mugyera. Akatoorana amabaare ataano g’enkurungu yaagata omu nshaho. Bwanyima Daudi akairuka arikwizira Goliasi. Goliasi akamugira ati: ‘Mwojo we ija. Niinyija kukubaagira amahungu g’omu mwanya n’enyamaishwa.’ Daudi taratiinire. Daudi akamugarukamu ati: ‘Noonyizira oine rurara n’eicumu, kwonka nyowe niinkwizira omu iziina rya Yehova. Torikurwanisa itwe; oriyo noorwanisa Ruhanga. Buri omwe ori aha naija kumanya ngu Yehova aine amaani kukira rurara n’eicumu. Mwena naija kubahayo omu mikono yaitu.’

Daudi akata eibaare omu njungu ye yaarirekyera n’amaani ge goona. Ahabw’okuhwerwa Yehova, eibaare rikateera Goliasi aha buso ryamutaahamu. Goliasi akagwa ahansi yaafa. Bwanyima Abafilistia bakairuka baahunga. Naiwe nooyesiga Yehova nka Daudi?