Gyihova zele Samoɛle kɛ: ‘Kɔ Gyɛsi sua nu. Ɔ mra ne mɔ ko a bali Yizilayɛ belemgbunli a.’ Yemɔti Samoɛle hɔle Gyɛsi sua nu. Mɔɔ ɔnwunle ɔ ra kpanyinli ne la, ɔzuzule kɛ: ‘Kpavolɛ ɛhye a bɛkpa ye la.’ Noko Gyihova zele Samoɛle kɛ, tɛ yemɔ ɔ. Eza ɔhanle kɛ: ‘Mame menea mɔɔ wɔ awie ahonle nu la na tɛ kɛzi ɔde wɔ ɛnyelɛzo la.’

Gyɛsi vale ɔ mra mrenyia nsia hilele Samoɛle. Noko Samoɛle hanle kɛ: ‘Gyihova ɛtɛkpale bɛ nuhua biala. Ɛlɛ ɛ mra mrenyia gyɛne wɔ ɛkɛ ɔ?’ Gyɛsi buale kɛ: ‘Yeha nuhua ekyi ne, bɛfɛlɛ ye Devidi. Yeva me mboane ne mɔ yehɔ adidi.’ Mɔɔ Devidi rale la, Gyihova zele Samoɛle kɛ: ‘Ɛhye a mekpa ye a.’ Yemɔti Samoɛle kpokpale Devidi kɛ ɔbali Yizilayɛ belemgbunli kenle bie.

Nzinlii, Yizilayɛma nee Filisitiama nyianle konle. Ɛnee Golayate, nrenyia kakanyinli bie mɔɔ anwo yɛ se kpalɛ la boka Filisitiama anwo. Golayate golole Yizilayɛma anwo alehyenlɛ biala. Ɔdeanle nu kɛ: ‘Bɛye awie ko bɛmaa ɔ nee me ɛraho. Saa ɔdi konim a, yɛbayɛ bɛ ngɛkɛlɛ yɛɛ saa medi konim a, bɛbayɛ yɛ ngɛkɛlɛ.’

Devidi vale aleɛ rɛlɛle ɔ mediema ne mɔ mɔɔ le sogyama la wɔ sogyama azokoɛleɛ ne. Mɔɔ ɔdele Golayate agolobɛnwo ne la, ɔhanle kɛ: ‘Me nee ye baho!’ Belemgbunli Sɔɔlo zele ye kɛ: ‘Kyɛkyɛ ɛle kakula!’ Devidi buale kɛ: ‘Gyihova baboa me.’

 Anrɛɛ Sɔɔlo maa Devidi ava ye konle ninyɛne ne ahɔho, noko Devidi hanle kɛ: ‘Menrɛhola, ɔyɛ ɛlomboɛ somaa.’ Akee Devidi vale ye totoabɔ ne na ɔhɔle azudenle bie anloa. Ɔsesale awolɛ nnu ɔguale ye baage ne anu. Akee ɔnriandile ɔhɔyiale Golayate. Golayate deanle nu hanle kɛ: “Bɛla maa menva wɔ nwonane memaa anwomanyunlu nloma nee ɛbɔkunlu nanemgbole ɛli.” Noko Devidi anzulo. Ɔdaye noko ɔdeanle nu ɔhanle kɛ: ‘Wɔmɔ ɛlɛ konle dadeɛ nee atwɛ a ɛlɛba me nwo zo a, noko mame, melɛba ɛ nwo zo wɔ Gyihova duma nu. Tɛ yɛdayɛ a ɛ nee yɛ ɛlɛko a, emomu Nyamenle ɔ. Awie biala mɔɔ wɔ ɛke la banwu kɛ Gyihova lɛ tumi tɛla konle dadeɛ nee atwɛ. Ɔbaye bɛ yeawula yɛ sa nu ɛnɛ.’

Devidi vale bolɛ ko wulale ye totoabɔ ne anu na ɔdole. Gyihova moalɛ zo, bolɛ ne hɔbɔle Golayate anwoma zo na ɔminli ɔhɔle nu. Nrenyia kakanyinli ne dɔle aze wule. Akee Filisitiama guale ye nwo. Asoo ɛlɛ Gyihova anu anwodozo kɛ Devidi ɔ?