Imbaga nen Jehova ed si Samuel: ‘La kad abung nen Jesse. Sakey ed saray anak to so onsublay ya ari na Israel.’ Kanian linmay Samuel ed abung nen Jesse. Nen anengneng nen Samuel imay panguloan, inisip to: ‘Seguradon aya so pinili nen Jehova.’ Balet imbaga nen Jehova ed si Samuel ya aliwan sikato so pinili to. Imbaga nen Jehova: ‘Say nenengnengen ko et say walad puso na too, aliwan say itsura to.’

Tinawag nen Jesse so anemira nin ananak to pian nanengneng ira nen Samuel. Balet imbaga nen Samuel: ‘Anggapod sikara so pinili nen Jehova. Wala ni arum ya anak mo?’ Imbaga nen Jesse: ‘Wala ni sakey, amay bolirek ko, si David. Manpapastol na karnero.’ Kasabi nen David, imbaga nen Jehova ed si Samuel: “Sikato so pinilik!” Kinalboan nen Samuel na larak so ulo nen David pian ipanengneng ya sikato so pinili nen Jehova ya onsublay ya ari na Israel.

Kayari na pigaran taon, linma iray Israelita ya mi-guerra ed saray Filisteo. Walay higanten sundalo na saray Filisteo ya say ngaran to et Goliat. Inagew-agew ton kakantiawan iray Israelita. Iyeeyag to: ‘Manpili kayo na milaban ed siak. No sikatoy manalo, magmaliw kamin aripen yo. Balet no siak so manalo, magmaliw kayon aripen mi.’

Nen linmay David diad kampo na saray sundalo na Israel pian iyawitan na naakan iray kuya ton sundalo, arengel toy Goliat. Imbaga nen David: ‘Siak so milaban ed sikato!’ Pero imbaga nen Arin Saul: ‘Balet ugaw ka ni.’ Inmebat si David: ‘Tulongan ak nen Jehova.’

 Inala nen Saul so kawes ton pan-guerra tan impaisulong tod si David, balet say kuan nen David: ‘Nairapan ak ya milaban no akasulong ed siak ’ya.’ Say inawit labat nen David et palsot insan linmad kulos. Nandokdok na limaran makinis ya bato tan inkarga tod pananginan to. Insan batik si David ed kawalaan nen Goliat. Inyeyag na higante: ‘Ugaw, gala dia, ta ipakan ta kad saray ontitikyab ya manok tan ed saray masibeg ya ayayep.’ Agnatatakot si David. Inyeyag to met: ‘Milaban kad siak ya walay espadam tan gayang, pero milaban ak ed sika diad ngaran nen Jehova. Aliwan sikami so kakalabanen mo, say Dios mi! Nanengneng na amin a wadia ya mas makapanyari si Jehova nen say espada tan gayang. Tulongan to kami pian natalo kayo.’

Binalaan nen David na sakey a bato so palsot to, mapmaples ton inwasiwes, insan to intira. Diad tulong nen Jehova, naknad moling si Goliat tan kinmutep so bato. Atumba so higante tan inatey. Kanian batik tan tinmakas iray Filisteo. Sika ey, mantitiwala ka met ed si Jehova, singa si David?