Jehová Diosqa Samuelman nerqa: “Isaipa wasinman riy, ujnin wawan Israelpi rey kanqa”, nispa. Samueltaj rerqa, Isaipa kuraj wawanta rikuspataj sonqonpi nerqa: “Kaychá ajllasqa reyqa”, nispa. Jehová Diostaj Samuelman nerqa mana paychu kasqanta. Chantapis nerqa: “Noqaqa runaj sonqota qhawani, manataj rijchʼaynillantachu”, nispa.

Isaiqa waj sojta wawasnintawan Samuelman pusamorqa. Samueltaj nerqa: “Ni mayqenta Jehová Dios ajllanchu. ¿Kayllachu wawasniyki?”, nispa. Isaitaj nerqa: “Aswan sullkʼa kanraj. Payqa ovejasta michishan”, nispa. David chamojtintaj, Jehová Diosqa Samuelta nerqa: “Payta ajllani”, nispa. Chantá Samuelqa Israelpi rey kananpaj aceitewan umanta jawiykorqa.

Unayninmantaj, israelitasqa filisteoswan maqanakorqanku. Filisteospataqa jatun soldadonku karqa, Goliat sutiyoj. Paytaj sapa día israelitasmanta alqochakuspa nej: “Uj runata kachamuychej noqawan maqanakunanpaj. Atipawanqa chayqa, esclavosniykichej kasqayku. Atipasaj chayri, esclavosniyku kankichej”, nispa.

Davidpa hermanosnenqa soldados karqanku. Davidtaj paykunaman mikhunata apashaspa Goliatta uyarerqa. Chayrayku nerqa: “Noqa maqanakamusaj”, nispa. Saultaj nerqa: “Wawallaraj kanki”, nispa. Davidtaj nerqa: “Jehová yanapawanqa” nispa.

 Saultaj maqanakuna ropanta qorqa. Davidtaj nerqa: “Mana kay ropawan maqanakuyta atisajchu”, nispa. Chantá Davidqa warakʼanta oqhariykukuspa, waykʼomanta phishqa llosqʼo rumista wayaqanman churaykuspa Goliatwan tinkoj rerqa. Goliattaj qhaparerqa: “Jamuy kayman. Aychaykita suwintusman qarasaj, kʼita phiña animalesmanwan”, nispa. Davidtaj mana manchikuspa nerqa: “Qanqa espadawan tʼojsina lanzawan jamushanki. Noqarí jamushayki Diosniypa sutinpi. Mana noqaykuwanchu maqanakushanki, manaqa Dioswanmin. Kunanqa tukuy yachanqanku espadamanta nisqa, lanzamanta nisqa Jehová Dios aswan atiyniyoj kasqanta. Paytaj makiykuman qankunata jaywaykuwasqayku”, nispa.

Chantá Davidqa warakʼanman rumita churaykuytawan, tukuy kallpanwan warakʼarqa. Jehová Diospa yanapanwantaj, rumeqa Goliatpa frentenman satʼiykukorqa. Jatun runa Goliattaj, wañusqa choqakorqa. Chantá filisteosqa ayqerikaporqanku. Yachakunchej jina, may allinpuni David jina Jehová Diospi atienekunaqa.