Jehová xubʼij che Samuel: «Jat pa ri rachoch ri Jesé. Jun chke ri ralkʼwal kux ri jun chik ajawinel rech Israel». Rumal laʼ Samuel xbʼek, are chiʼ xril ri nabʼeʼal, xuchomaj: «Qas are wajun ala riʼ ri chaʼom». Are kʼu ri Jehová xubʼij che Samuel che are taj, xuqujeʼ xubʼij che: «In kwil ri qas kibʼanik ri winaq, xaq xiw ta ri kilitajik».

Jesé xeʼukʼam lo ri e waqibʼ ukʼojol chuwach ri Samuel. Are kʼu ri Samuel xubʼij: «Jehová uchaʼom ta nijun. ¿La kʼo más awalkʼwal?». Jesé xubʼij: «Kraj na ri más nitzʼ, David, che tajin keʼuchajij ri e chij». Are chiʼ xok bʼik, Jehová xubʼij che Samuel: «¡Areʼ waʼ!». Rumal laʼ Samuel xuya aceite pa ujolom ri David. Je waʼ xbʼan che uchaʼik rech kux ri jun chi ajawinel rech Israel.

Qʼaxinaq chi ri tiempo, ri israelitas e kʼo pa chʼoj kukʼ ri filisteos, che kʼo jun kajchʼoj che sibʼalaj nim raqan, ubʼiʼ Goliat. Ronojel taq qʼij ri Goliat ktzeʼn chkij ri israelitas xuqujeʼ kuraq uchiʼ chkij: «Chitaqaʼ lo jun achi rech kchʼojin wukʼ. We kinuchʼako, kojux iwajchakibʼ. Are kʼu we in kinchʼakanik, kixux qajchakibʼ».

David xbʼe jachiʼ e kʼo wi ri ajchʼojabʼ rech keʼuya kiwa ri e rachalal che e ajchʼojabʼ. Chilaʼ xuta ri kubʼij Goliat are chiʼ kuraq uchiʼ, xubʼij: «In kinchʼojin rukʼ». Ri ajawinel Saúl xubʼij che: «Are kʼu xa at jun alaj ala». David xubʼij che: «Jehová kinutoʼ».

Rumal laʼ, Saúl xuya ri ratzʼyaq xuqujeʼ  ri uchakubʼal re chʼoj che, are kʼu David xubʼij: «Kinkun taj kinchʼojinik we kinkoj ri jastaq riʼ». Rumal laʼ ri David xukʼam bʼi ri uhonda. Xbʼe chuchiʼ jun nimaʼ, xuchaʼ jobʼ abʼaj tekʼuriʼ xunim pa ri uchim. Tekʼuriʼ chanim xbʼe rukʼ ri Goliat. Ri nim raqan achi xuraq uchiʼ xubʼij: «¡At, alaj ala, chatqebʼ loq tekʼuriʼ kawil kʼu na! Kinbʼan na kiwa ri e chikop ajuwokaj xuqujeʼ ri e awaj rech ri e juyubʼ chawe». David kuxibʼij ta ribʼ xubʼij: «At katchʼojin wukʼ rukʼ jun espada xuqujeʼ rukʼ jun raqan chʼichʼ, are kʼu ri in kinchʼojin awukʼ pa ri ubʼiʼ ri Jehová. Katchʼojin ta qukʼ, rukʼ ri Dios katchʼojin wi. Konojel ri e kʼo waral kkilo che Jehová más nim na uchuqʼabʼ chuwach jun espada o jun raqan chʼichʼ. Jehová kixuya na iwonojel ix pa ri qaqʼabʼ».

Tekʼuriʼ ri David xuya jun abʼaj pa ri uhonda tekʼuriʼ xukʼaq bʼi rukʼ ronojel uchuqʼabʼ. Rukʼ ri utobʼanik ri Jehová, sibʼalaj chanim kel bʼi ri abʼaj tekʼuriʼ xok che ri umetzʼal upalaj ri Goliat. Ri nim raqan achi xkamik. Ri e filisteos xeʼanimaj bʼik rech kekamisax taj. ¿E ri at? ¿La kakubʼsaj akʼuʼx chrij ri Jehová junam che xubʼan David?