Diosmi Samuelta niran: “Jesepa wasinta riy, jujnin wawantan ajllani rey kananpaq”, nispa. Jinan Samuelqa Jesepa wasinta rispa kuraq wawanta rikuspa sonqonpi niran: “Paytachá ajllakun”, nispa. Diosmi ichaqa willaran mana paychu kasqanta, jinaspa niran: “Noqaqa sonqotan qhawani, manan rijch’aynintachu”, nispa.

Jeseqa soqta wawankunatawanmi pusamuran. Samuelmi ichaqa niran: “Diosqa manan mayqentapas ajllanchu. ¿Chayllachu qhari wawaykikuna?”, nispa. Jesetaq niran: “Kashanraqmi sullk’a kaqqa, sutinmi David, ovejakunatan michimushan”, nispa. David jamuqtinmi Diosqa Samuelta niran: “¡Paytan ajllani!”, nispa. Jinan Davidpa umanman aceiteta jich’aykuran. Chaywanmi ajllaran rey kananpaq.

Tiempowanmi Israel runakunaqa Filistea runakunawan guerrapi karanku. Filistea runakunamanta Goliat sutiyoq jatunkaray runan, sapa p’unchay Israel soldadokunamanta burlakuspa niran: “Juj runata kachamuwaychis noqawan maqanakunanpaq. Ganawaqtinqa servisaykikun. Noqa ganaqtiytaq qankuna serviwankiku”, nispa.

Davidpa hermanonkunaqa soldadokunan karanku, chaymi Davidqa paykunaq kasqanman riran mijunata aparikuspa. Goliat-ta uyarispan Davidqa niran: “¡Noqa maqanakusaq!”, nispa. Rey Saultaq niran: “Erqellaraqmi kanki”, nispa. Davidtaq niran: “Diosmi yanapawanqa”, nispa.

 Jinan Saulqa Davidman qoran armaduranta, Davidtaq niran: “Kaywan churakuspaqa manan maqanakuyta atiymanchu”, nispa. Chaymi Davidqa warak’anta aparikuspa mayuta riran pisqa llusk’a rumikunata pallananpaq, chaytataq ch’uspanman churaspa Goliatman riran. Goliat-taq niran: “¡Yau erqe jamuy, imataraq ruwarusayki! ¡Aychaykitan salqa animalkunaman qosaq!”, nispa. Davidqa mana manchakuspan niran: “Qanqa espadawan lanzawan iman jamunki, noqan ichaqa Jehová Diospa sutinpi jamuyki. Manan noqaykuwanchu maqanakushanki, aswanpas Dioswanmi. Llapankun yachanqaku Jehová Diosqa espadamantapas lanzamantapas aswan atiyniyoq kasqanta. Paymi makiykupi qankunata entregawanqaku”, nispa.

Jinan Davidqa rumita warak’anman churaspa llapan kallpanwan wark’aran. Jehová Diospa yanapayninwanmi rumiqa Goliatpa mat’inpi ch’antikuran. Goliat-taq pampaman wañusqa urmarpariran. Jinan Filistea soldadokunaqa ayqekuranku mana wañunankupaq. Davidqa Diospin confiaran, ¿pay jinachu qanpas Diospi confianki?