Jehová Diosca Samueltaca nircami: Jesé runapaman ri. Chaipimi ‘paipa churicunamanda jatun mandaj cachun shujta ña agllarcani’ nishpa. Chaimi Samuelca Jesepa huasiman rishpa, paipa punda churita ricushpaca ‘Diosca caitami jatun mandaj cachun agllashcanga’ yarca. Shinapash Jehová Diosca Samueltaca nircami, paitaca na agllashcanichu. ‘Ñucaca, runashnaca na ricunichu. Runaca, paipa ñavipi ricurishcatallami ricun. Ashtahuangarin ñucaca shungutami ricuni’ nishpa.

Jesé runaca paipa 6 churicunatapashmi Samuelman ricuchirca. Shinapash Samuelca nircami: Jehová Diosca “caicunataca na agllashcachu”. ‘Canba churicunaca ¿caicunallachu can?’ nishpa. Shina nijpimi Jeseca nirca: “Shuj uchilla churigullami tiapan. Paica, llamacunatami michijun” nishpa. David ‘chayamujpimi Diosca Samueltaca nirca: Paimi, jatun mandaj tucugrin. Jatarishpa, paipa umapi aceiteta talishpa javilla’ nishpa. Shinami Davidtaca Saulpa randi israelitacunata mandaj cachun agllarca.

Asha tiempo jipaca israelitacunaca filisteocunahuanmi macanajunajurca. Filisteocunaca shuj jatun macanajuj Goliat shuti runatami soldadopurapica charirca. Chai Goliat runaca cada punllami israelitacunamanda burlarishpa caparijun carca: ‘Canguna puramanda shuj runata agllashpa, ñucahuan macanajuchun cachamuichi. Macanajushpa ñucata mishajpica ñucanchica cangunapa esclavocunami tucushun. Cutin ñuca mishajpica, cangunami ñucanchipa esclavocuna tucunguichi’ nishpa.

Davidpa huauquicunaca soldadocuna caimandami, chaishuj soldadocunandi carpacunapi tandanajushca carca. Chaimi Davidca paipa huauquicunaman micunata apashpa rijurca. Chaipimi Goliat runa israelitacunata caparijujta uyashpa Davidca cashna nirca: “Chai filisteohuanga, canda servij ñucallata macanajungapaj  rishallami” nishpa. David shina nijpimi rey Saulca cashna nirca: “Canga, chairalla huambragumi cangui” nishpa. Chaimi Davidca Jehová Diosmi ñucataca ayudahuanga nirca.

Shina nijpimi “Saulca, paipaj churajunata Davidman churachirca”. Chaimi Davidca “caicunata churajushpaca” na macanajuita ushashachu nirca. ‘Chai jipami larcaman rishpa llambulla picha rumita agllashpa paipa muchilapi churarca. Jipaca, paipa huaracata apashpami chai filisteopaman rirca’. Goliat Davidta ricushpaca cashnami caparirca: “Ñucapajman shamuilla. Canda huañuchishpaca jahuata rij alasyu animalcunaman, sachapi causaj animalcunamanmi carasha” nishpa. Davidca na manllashpami cashna nirca: ‘Canga espadahuan, jatun lanzahuambashmi ñucapaman shamungui’. Cutin ñucaca, Jehová Diospa shutipimi canbaman shamuni. Ashtahuangarin ñucanchihuanga na macanajunajunguichichu, Taita Diostami cangunaca fiñachishcanguichi. Jehová Diosca, “na espadahuan, na lanzahuan quishpichij cajtami, tucui caipi tandanajushcacunaca yachanga”. Cai macanajuica Jehová Diospami, paimi, cangunataca ñucanchi maquipi churanga nishpa.

Chai jipaca Davidca chai rumita paipaj huaracapi churashpami, Jehová Diospa ayudahuan chai filisteo runapa frentepi huashajujta shitarca. Chaimandami chai runaca huañushpa alpaman urmarca. Chaita ricushpami filisteocunaca paicunata ama huañuchichun calpanajurca. Davidca Jehová Diospimi confiarca. Quiquinga ¿David cuendachu Jehovapi confiangui?