O Jehova phendža e Samuilese: „Dža ko e Jesejeso čher. Jekh ando oljese čhave ka ovel kralj ko Izrael palo Saul.“ Tegani o Samuilo dželo ko Jesej. Ked dikhlja oljese najphuredere čhave, mislindža: „O Jehova sigurno birindža akalje.“ Ama, o Jehova phendža e Samuilese so na birindža olje. Ov phendža ljese: „Me dikhava savo tano e manušeso vilo, a na sar izgledini avrijal.“

Anglo Samuilo ikljilje pana šov e Jesejese čhave. Ama, o Samuilo phendža ljese: „O Jehova na birindža nijekhe oljendar. Isi tut li pana čhave?“ O Jesej phendža ljese: „Isi man pana jekh o najtikno, o David. Ov arakhi e bakren.“ Ked alo o David, o Jehova phendža e Samuilese: „Olje birindžum!“ O Samuilo čhordža ulje upro oljeso šero hem adžahar pomazindža lje te ovel aver kralj ko Izrael.

Palo disavo vreme, o Izraelcija počmindže maribe e Filistejencar. Ki oljengi strana hine jekh but baro vojniko, kova vičindža pe Golijat. Ov svako dive asandilo e Izraelcendže. Glasno vičindža: „Hajde, nek avel neko te borini pe mancar. Ako ov pobedini, amen ka ova tumare robija. Ama, ako me pobedinava, tegani tumen ka oven amare robija.“

Jekh dive, o David alo ko than kaj hine i Izraelsko vojska te anel diso hajbase pe phraljendže, kola hine vojnikija. Ked šundža so vačeri o Golijat, o David phendža: „Me ka borinav man oljeja.“ O kralj Saul phendža ljese: „Ama tu hijan pana tikno.“ Ama, o David phendža: „O Jehova ka pomožini man.“

 O Saul dindža e Davidese piklji oprema aso maribe, ama o David phendža: „Našti te borinav man akala opremaja.“ O David ljelja o šelo koljeja hine fordena pe o bara hem dželo ki jekh reka. Odothe birindža pandž glatka bara hem čhivdža ljen ki pi torba. Tegani prastandilo premalo Golijat. O Golijat phendža ljese: „Ava koro mande, tikneja. Ka parvarav e čirikljen hem e divlja životinjen tuvaja.“ Ama, o David na darandilo. Ov phendža ljese: „Tu aveja anglo mande e mačeja hem e kopljeja, a me avava ko e Jehovaso anav! Tu na borineja tut protiv amende, nego protiv o Devel. Sarine kola tane akate ka dikhen so o Jehova tano pozoralo ando mač hem ando koplje. Avdije ov ka predajini tumen ko amare vasta.“

Tegani, o David čhivdža jekh bar ko šelo hem počmindža te vrtini lje sa pe snagaja. O Jehova pomožindža o bar te khuvel e Golijate pravo ko čekat. Tegani ov pelo ki phuv hem mulo. Ked dikhlje odova, o Filistejcija počmindže te našen. Da li hem tu isi tut poverenje ko Jehova sar so hine lje o David?