NSOLO 40
Dhavidhi na Goliati
Yahova apanga Samweli: ‘Ndoko kunyumba kwa Yese. M’bodzi mwa ana ace anadzakhala mambo wa Israeli.’ Natenepa Samweli aenda kunyumba kwa Yese. Pidaona iye mwana wakutoma wa Yese, iye anyerezera: ‘M’phale uyu ndiye anadzakhala mambo.’ Mbwenye Yahova apanga Samweli: ‘Ine ndisaona muntima mwa munthu, tayu basi maonekero ace akunja.’
Yese abweresa pontho kuna Samweli anace atanthatu. Mbwenye Samweli alonga: ‘Nee m’bodzi mwa iwo adasankhulwa na Yahova. Uli na ana anango?’ Yese atawira: ‘Ndiri naye m’bodzi, mwananga wakumalisira, Dhavidhi. Iye akudyesa mabira anga.’ Mudafika Dhavidhi, Yahova apanga Samweli: ‘Uyu ndiye adasankhula ine!’ Samweli akwata mafuta mbathirira mu nsolo wa Dhavidhi, toera kupangiza kuti ndiye anadzakhala mambo wa Israeli.
Mukupita kwa ndzidzi, Afilisti aenda kamenyana na Aisraeli. Iwo akhali na nyankhondo akhacemerwa Goliati wakuti akhali cimphona. Ntsiku zonsene, Goliati akhasingirira Aisraeli. Iye alonga mwakugaluza: ‘Tumani mamuna m’bodzi abwere dzamenyana na ine. Angawina, ife tinadzakhala mabitcu anu. Mbwenye angawina ndine, imwe munadzakhala mabitcu athu.’
Dhavidhi aenda kuna anyankhondo a Israeli toera kupasa abale ace cakudya, akuti akhalimbo anyankhondo. Iye abva pikhalonga Goliati, mbalonga: ‘Ndinamenyana naye!’ Mambo Sauli alonga: ‘Mbwenye iwe ndiwe mwana.’ Dhavidhi atawira: ‘Yahova anadzandiphedza.’
Sauli ayesera kupasa Dhavidhi pida pyace pya nkhondo, mbwenye Dhavidhi alonga: ‘Nee ndinakwanisa kupikwata.’ Dhavidhi akwata funda yace mbaenda ku nkulo. Iye asankhula miyala mixanu yakuzwerera mbaiikha m’budu mwace. Buluka penepo, Dhavidhi athamanga kuenda kuna Goliati. Goliati akhuwa: ‘Bwera kuno. Ndinadzapasa nyama yako ninga cakudya kuna mbalame za kudzulu na pinyama pya ntsanga.’ Dhavidhi nee akhagopa. Iye atawira: ‘Iwe ukubwera na supada na dipa, mbwenye ine ndikubwera na dzina ya Yahova. Iwe nee ukumenyana na ife; iwe ukumenyana na Mulungu. Anthu onsene anadzadziwa kuti Yahova ndi wamphambvu kupiringana supada peno dipa. Iye anatiphedza toera kukukunda.’
Dhavidhi aikha mwala mu funda yace mbaponya na mphambvu yace yonsene. Na ciphedzo ca Yahova, mwala wamenya pa nkhope ya Goliati mbupita nkati. Iye agwa pantsi mbafa. Buluka penepo, Afilisti athawa. Kodi iwe usanyindirambo Yahova ninga pidacita Dhavidhi?
‘Kuna anthu nkhabe kwanisika, mbwenye tayu kuna Mulungu, thangwi kuna Mulungu pinthu pyonsene ndi pyakukwanisika.’ —Marko 10:27
Panango Munakomerwa Kudziwa Ipi
Pfundzisani Ananu
Dhavidhi Nee Akhagopa
Lerini mbiri ineyi yakudzumisa ya m’Bhibhya toera kudziwa pidacitisa Dhavidhi kukhala wacipapo kakamwe.
