Yehuwa naul᷊ị si Samuel, ’Dakọe sarang bal᷊eng i Isai. Sěngkatau anạe sarung makoạ datung Israel buhu.’ Hakị u ene, Samuel nakoạ sarang bal᷊eng i Isai. Su tempong i sie nakasilo anạ i Isai esẹ kaiakanenge, i sie nẹ̌pikirẹ̌ anạ ene sarung makoạ datu. Katewe Yehuwa naul᷊ị bal᷊inẹ anạ ene nipile-Ne. Yehuwa naul᷊ị, ’Iạ měmanda naung, bal᷊inẹ penampilan.’

Isai nẹ̌bawa ěnungu katau anạe esẹ sarang i Samuel. Katewe Samuel naul᷊ị, ’Yehuwa tawe němile si sire. Si kau piạ anạ esẹ bal᷊inẹ? Isai naul᷊ị, ’Piạ katuariange, i Daud. I sie měnděndiagạ domba.’ Su tempong i Daud nahumpạ, Yehuwa nẹ̌bera si Samuel, ’I sie Takụ nipile!’ Samuel něhengkẹ si sie nakoạ datu wuhu su Israel, kụ něněbohẹ̌ lana su těmbọ i Daud.

Piạ su sěngkatempo, tau Israel mẹ̌pěrang lumawang tau Filistin. Su tau Filistin piạ prajuritẹ̌ arenge Goliat, badange sěbạe marangẹ. Ěllo-ěllo, Goliat mělẹ̌heghesẹ̌ tau Israel. I sie němansagẹ̌, ’Pilẹe sěngkatau gunang lumawang si siạ. Mạeng i sie makauntung, i kami sarung makoạ ělang i kamene. Katewe mạeng iạ makauntung, i kamene makoạ ělang i kami.’

Daud nakoạ sarang perkemahan prajuritu Israel gunang měnonda kaěngu manga tuhange apang nakoạ prajuritẹ̌. I sie nakaringihẹ̌ bawerang i Goliat kụ i sie mapulu mělawang si Goliat. Katewe Datu Saul nẹ̌bera, ’I kau bědang kadodọ.’ Daud simimbahẹ̌, ’Yehuwa mẹ̌tul᷊ung si siạ.’

 Saul něgělị lakụ pěrang si Daud, katewe Daud naul᷊ị, ’Iạ tawe wiasa měpakẹ pakeang kere ini.’ Daud nẹ̌bawa umban, ene kai alatẹ̌ gunang měmal᷊ọ batu, kụ i sie nakoạ sarang sal᷊ụ. I sie němile batu mal᷊iewehẹ̌ bọu sal᷊ụ ene kụ nitahone su tasẹ̌e. Bọu ene, Daud nakoạ sarang i Goliat. Angsuang ene němansagẹ̌, ’Siniko i kau, anạ kadodọ. Iạ sarung měgělị gěsinu su burung dingangu binatang.’ Katewe i Daud tawe natakụ, kụ i sie němansagẹ̌, ’I kau mělawang si siạ dingangu peda lai dal᷊eang, katewe iạ lumawang si kau dingangu areng i Yehuwa. I kau limawang su Mawung kami, bal᷊inẹ si kami. Kěbị taumata sarung makasingkạ Yehuwa limembong makawasa bọu peda arau dal᷊eang. I Sie sarung měnarakang i kamene su limang i kami.’

Daud nẹ̌taho batu su umban, bọu ene umban ene niputarẹ̌ pakaihạ-ihạ. Ual᷊ingu Yehuwa nẹ̌tul᷊ung si Daud, batu ene nahino su rěhụ i Goliat. Angsuang ene nahaka kụ nate. Kěbị tau Filistin timal᷊ang. Apa i kau lai mangimang si Yehuwa kere i Daud?